Seancën nuk e filluan siç bëjnë zakonisht.
Deputetët e Partisë Demokratike dhe Aleancës për Ardhmërinë e Kosovës këtë herë i nisën me zhurmë punimet.
Kjo për shkak të kundërshtimit të ligjit për pagën minimale.
E menjëherë pas këtij veprimi, fjalën e mori deputeti i LVV-së, Gani Krasniqi.
Ndërsa deputeti i PDK-së, Rashit Qalaj tha se parlamenti nuk do të mund të funksionojë normalisht derisa të tërhiqet Ligji për Pagën Minimale.
Ndërprerjen e kësaj seance plenare e kërkoi edhe deputetja e Grupit Parlamentar të AAK-së, Time Kadrijaj.
Pas kësaj, seanca u ndërpre pasi deputetët e PDK-së e AAK-së qëndruan në këmbë tek foltorja e Kuvendit.
Madje, shefi i Grupit të PDK-së, Abelard Tahiri, e hoqi mikrofonin e foltores së Kuvendit të Kosovës, duke kërkuar që deputetët e opozitës të reflektojnë.
Pas kësaj ndërprerje, kryeparlamentari Glauk Konjufca u takua me shefat e Grupeve Parlamentare.
E pas orës 13, filloi sërish Seanca e Kuvendit të Kosovës.
Mirëpo, për të dytën here kërkesat për ndërprerje të seancës vazhduan nga deputetët e PDK-së e AAK-së.
Ndërsa kryeministri i Kosovës, Albin Kurti, gjatë fjalës së tij bëri të ditur se e anulon pjesëmarrjen e nesërme në Forumin e Prespës, për t’i takuar veteranët.
Madje ai hodhi kritika ndaj opozitës, veçanërisht ndaj shefit të grupit parlamentar të PDK-së, Abelard Tahiri.
E ky i fundit kërkoi nga Kurti të takojë të enjten veteranët.
Përplasja e Kurtit vazhdoi edhe me deputetin e AAK-së Bekë Berisha.
Pas debateve, deputetët e PDK-së dhe AAK-së, bllokuan sërish punimet, duke bërë kështu që Kuvendi të shkojë për një pauzë tjetër, për më shumë se një orë.
Pavarësisht që u kthyen, nuk u pa vullnet tek tabori opozitar, e kryeparlamentari Konjufca u detyrua që seancën e kësaj jave të shtyj për tjetrën.
Raporti i gazetares Fetije Kamberi.
