Megjithatë zyrtarë të saj kishin tërhequr para nga trusti në kohën kur në Qeverinë Hoti kishte kaluar projektligji për rimëkëmbje ekonomike.
Njëri prej tyre është edhe Visar Korenica, i cili asokohe nuk ishte deputet por zyrtar i lartë i kësaj partie.
Ai tash thotë se tërheqja nga trusti nënkupton rritje të pabarazisë.
“Në kohën e qeverisë Hoti jo të gjithë i kanë tërhequr, atëherë unë kam tërhequr si qytetar i rëndomtë, pra jo si një deputet që mund të ndikojë me votë në masë të përgjithshme. Qeveria duhet t’u dalë në ndihmë qytetarëve përmes politikave sociale siç ka bërë së fundmi me 100 milion, e jo ta bartë barrën e përgjegjësisë që ka ajo tek kursimet e qytetarëve. Tërheqja e këtyre mjeteve nënkupton rritje të pabarazisë”, thotë Korenica për Tëvë1.
Teksa ideja po kundërshtohet edhe nga Oda Ekonomike Amerikane.
“Ne konsiderojmë që kjo shumë ose tërheqja/zvogëlimi i kësaj shume mund të ndikojë pastaj në vëllimin e përgjithshëm të kursimeve që dikush mund të ketë edhe të cenojë një jetë edhe një standard, i cili do të duhej të ishte një standard i dinjitetshëm pas moshës së pensionimit”, thotë Arian Zeka drejtor i OEA-së.
Nëse sikur në vitin 2020, edhe njëherë lejohet tërheqja e parave nga trusti, sipas Zekës mund të krijohet një precedent i rrezikshëm.
“Sa herë që dikush vije në pushtet e nuk ka politika më kreative ose masa më kreative të cilat mund t’i prezantojë dhe t’i bëjë të efektshme, atëherë kalon në diçka të tillë që është shumë më e lehtë”, wshtw shprehur ai.
Gjatë së mërkurës, iniciuesi i tërheqjes së kursimeve pensionale, deputeti nga PDK-ja Bekim Haxhiu ua ka shpërndarë projektligjin deputetëve dhe i ka ftuar ta votojnë atë.
Kronika e realizuar nga Gojart Jashari
