Për shumë vite një pjesë e fshatit Caravikë të Klinës ishte deponi mbeturinash.
Por shumë shpejt, ajo pjesë do shndërrohet në park për banorët e këtij fshati.
E për të parë nga afër punimet, aty të premten doli edhe i pari i Komunës, Zenun Elezaj.
Elezaj tha për televizionin se qëllimi i ndërtimit të një parku të tillë ka qenë që mos të dëmtohet më shumë ambienti.
“Do të shërbejë edhe për pastrimin e kësaj zone nga mbetjet e ngurta inerte të cilat janë grumbulluar me vite. Po besoj se është duke u bërë një punë e mirë edhe në kuptim të pastrimit të ambientit por do të jetë një pjesë e fshatit e rregulluar edhe për mundësi tjera si psh rekreacion, do të ketë kënd të lojërave, pastaj fshati planifikon me ndërtu një shtëpi të fshatit që do të jetë në funksion për nevojat e qytetarëve të fshatit Caravikë”, tha Elezaj.
Derisa shprehet optimist se nuk do të ketë më hudhje të mbeturinave, në të kundërtën do të shqiptojnë gjoba.
“Po unë kërkova edhe nga banorët që të informojnë institucionet kryesisht Inspektoriatin Komunal nëse do të ketë tentim hudhje të mbeturinave dhe ne do të veprojmë sipas rregullores komunale për gjoba dhe do të dënojmë çdo njërin që hedh mbeturina në këtë pjesë”, tha ai.
Këtij projekti po i gëzohen edhe banorët e këtij fshati të cilët thonë se do t’i jap edhe imazh më të mirë.
“Këtu bëhet këndi i lojrave, e ka një vlerë edukativo arsimore për fëmijët e këtij fshati. Përpara kanë lozur fëmijët këtu, tash po rregullohet se është mbushë me mbeturina”, tha Adem Dakaj – banor.
“E keni pa besoj se qysh u kon bërllog krejt, që nuk ia ka vlejtur as me kalu knej… Besoj që në qoftë se i shtrëngojnë pak dënimet e bëjnë kush nuk ka edhe mend nuk e qet bërllogin ma se kjo është pasqyrë edhe e jona”, tha Dakaj.
Ky park pritet të përfundohet brenda 30 ditësh e që i tëri është financim i Komunës së Klinës.