Gjykata Themelore në Ferizaj – Departamenti për të Mitur ka shpallur aktgjykim dënues ndaj të pandehurit F.V., i cili u gjet fajtor për veprën penale shmangie nga sigurimi i mjeteve për jetesë.
Seanca u drejtua nga gjyqtari Shabi Idrizi, i cili pas administrimit të provave shpalli fajtor të pandehurin dhe e dënoi me një vit burg, dënim i cili do të ekzekutohet pas plotfuqishmërisë së aktgjykimit.
Sipas dosjes gjyqësore, F.V. nga 3 tetori 2024 e deri më sot nuk ka përmbushur detyrimin ligjor për të siguruar mjetet e jetesës për dy fëmijët e tij të mitur, pavarësisht vendimit të Gjykatës të datës 22 qershor 2023.
Ai ishte i obliguar të paguante 700 euro në muaj ish-bashkëshortes së tij, A.G.V., për mbajtjen e fëmijëve, por këtë detyrim e kishte shmangur vazhdimisht.
Palët kanë të drejtë ankese ndaj aktgjykimit brenda 30 ditëve, ndërsa ankesa duhet t’i drejtohet Gjykatës së Apelit në Prishtinë përmes Gjykatës Themelore në Ferizaj.
