Sipas tij, Kosova nuk ka të drejtë të nënshkruajë ndonjë marrëveshje e cila nuk përfshin njohjen nga Serbia, pasi siç tha ai, nuk do kishte rrugë tjetër që Kosova të njihet nga 5 shtetet anëtare të Bashkimit Evropian të cilat ende nuk e kanë bërë një gjë të tillë.
“Procesi i dialogut duhet të intensifikohet për të shkuar drejt një marrëveshje finale ligjërisht të obligueshme, por gjithsesi me njohje reciproke. Kosova nuk guxon të nënshkruajë ndonjë marrëveshje e cila është më pak se njohje reciproke, sepse nuk mund të presim pafundësisht nga Serbia për të arritur marrëveshje finale. Mirëpo, nëse Serbia nuk do të arrijë marrëveshje me njohje reciproke, atëherë cila do ishte rruga e Kosovës drejt Bashkimit Evropian por edhe e strukturave tjera Euroatlantike e që mund të jetë njohja e 5 shteteve anëtare”, deklaroi Demhasaj në emisionin “Këndi i Debatit” në Tëvë1.
Tutje, Demhasaj tha se është e duhur kërkesa që erdhi nga Shtetet e Bashkuara të Amerikës dhe nga Bashkimi Evropian sa i përket intensifikimit të dialogut.
Kujtojmë se kryeministri i Kosovës, Albin Kurti, dhe presidenti i Serbisë, Aleksandar Vuçiq, kanë marrë mesazhet nga nivelet e larta politike dhe diplomatike të Bashkimit Evropian, në veçanti Gjermanisë dhe Francës, për t’iu qasur seriozisht arritjes së një marrëveshjeje ligjërisht obliguese ndërmjet dy vendeve./Tëvë1.info/
