Në sirtaret e Kushtetueses tashmë ndodhen dy lëndë, njëra për dështimin e seancës për zgjedhjen e presidentit, kurse tjetra për dekretin e Presidentes Vjosa Osmani, për shpërndarjen e legjislaturës së dhjetë.
Kryeparlamentarja Albulena Haxhiu, vlerëson se veprimet e Osmanit ishin të ngutshme dhe jo kushtetuese.
“Për mua ka qenë befasi, sepse është jokushtetues, i ngutshëm, dhe natyrisht do ta kundërshtojë si Kryetare e Kuvendit. Ju e dini se Kushtetuta parasheh rrethanat se kur shpërndahet Kuvendi i Kosovës, prandaj në këtë aspekt nuk ka asnjë rrethanë që i jep të drejtën presidentes që pa kaluar afati 60 ditor dhe pa dështuar në zgjedhjen e Presidentit t’a shpërndajë Kuvendin e Republikës së Kosovës”, shprehet Haxhiu.
Kërkesën për hedhje poshtë të dekretit të Osmanit, partia në pushtet e ka dorëzuar sot në kushtetuese.
“Këtij vendimi nuk do duhej t’i gëzohej asnjë deputet sepse realisht është minim i punës së Kuvendit… Situatat aktuale janë të tilla që nevojitet vigjilencë, vëmendje, shpejtësi, profesionalizëm nga ana e Gjykatës Kushtetuese dhe natyrisht thërras të gjithë ta lënë Gjykatën Kushtetuese që ta bëjë punën e saj sepse jam e bindur se ne rrethana të tilla Gjykata mund të vendoset në presione nga kushdo”, thotë ajo.
Gjatë ditës, nga Presidenca kanë treguar se e para e shtetit ende nuk e ka nënshkruar dekretin për datën e zgjedhjeve.
“Siç i ka njoftuar edhe partitë në takimin konsultativ, ajo është në pritje të Gjykatës Kushtetuese. Nëse Gjykata Kushtetuese e vlerëson si të nevojshme caktimin e një mase të përkohshme, Presidenca e mirëpret atë, duke ritheksuar se masa në asnjë moment nuk paragjykon vendimin përfundimtar të Gjykatës lidhur me kushtetutshmërinë e dekretit”, thuhet nga Presidenca.
E juristët vazhdojnë të kenë qëndrime të ndryshme, nëse Osmani kishte të drejt që ta shpërndante Kuvendin.
Avokati Alban Arifi, vlerëson se në rrethanat aktuale është e panevojshme vendosja e një mase të përkohshme nga ana e Kushtetutueses.
”Procedura është dashur të niset dy muaj para datës 5 mars dhe përfundon çdo gjë me datën 5 mars. Data 5 mars ka qenë data e fundit për zgjedhjen e presidentit andaj besoj dekreti i Presidentes është dekret i bazuar në Kushtetutë dhe në dispozitat e saj andaj unë pres që Gjykata Kushtetuese do ta refuzojë edhe propozimin për masë të përkohshme, po ashtu edhe kërkesën e LVV-së”, thotë avokati Alban Arifi.
Ndërkaq, ish-kryetari i Gjykatës Kushtetuese, Enver Hasani, në ditën kur Osmani e shpalli dekretin, deklaroi se Presidentja nuk ka të drejt ta marr një vendim të tillë.
Hasani argumentoi se Kuvendi nga dita kur nisën procedurat për zgjedhjen e Presidentit, ka 60 ditë kohë për ta përfunduar këtë procedurë.
