Policia e Kosovës ka raportuar se në vetëmbrojtje ka shtënë me armë ndaj të dyshuarit për grabitjen në Suharekë, pasi i njëjti kishte shtënë me armë në drejtim të pjesëtarëve policorë, raporton teve1.info
Sipas komunikatës së Policisë, gjatë aksionit për kapjen e grabitësve të argjendarisë në Suiharekë, një polic është plagosur, të cilit i është ofruar ndihma mjekësore.
Sipas komunikatës, gjatë aksionit janë arrestuar edhe katër të dyshuar, një është vrarë gjatë tentimit për lokalizim dhe një tjetër ndodhet në arrati.
“Gjatë zhvillimit të operacionit policor, një i dyshuar ka shtënë me armë zjarri në drejtim të zyrtarëve policorë duke ua rrezikuar drejtpërdrejt jetën e tyre, me ç’rast është plagosur një zyrtar policor. Zyrtarët policorë në vetëmbrojtje janë detyruar të përdorin forcën proporcionale, duke arritur të neutralizojnë një të dyshuar, përderisa katër të dyshuar të tjerë janë arrestuar. Deri më tani numri i të arrestuarve ka shkuar në shtatë persona, një i neutralizuar dhe një tjetër ende gjendet në kërkim policor.
Zyrtarit policor i është ofruar ndihma mjekësore në SHSKUK, ku sipas informatave të para nga mjekët kompetentë i njëjti është jashtë rrezikut për jetë.
Vlen të potencohet se personat e dyshuar kanë të kaluar kriminale me dyshimet e bazuara për përfshirje në vepra penale si: vrasje, grabitje, vjedhje e rëndë, sulm, kanosje, lëndim trupor, detyrim, armëmbajtje pa leje etj.
Të gjitha veprimet e mëtejme policore do të ndërmerren në bashkëpunim dhe koordinim me prokurorinë kompetente”, thuhet në komunikatën e Policisë.
Hetimet për kapjen e grabitësve të dyshuar janë zhvilluar në Prishtinë, Fushë Kosovë dhe Carralevë.
Sipas njoftimit policor, personat e dyshuar kanë të kaluar kriminale me dyshimet e bazuara për përfshirje në vepra penale si: vrasje, grabitje, vjedhje e rëndë, sulm, kanosje, lëndim trupor, detyrim, armëmbajtje pa leje etj.
Të gjitha veprimet e mëtejme policore do të ndërmerren në bashkëpunim dhe koordinim me prokurorinë kompetente.
