Refuzimi i deputetëve për të votuar komisionin është refuzim për të realizuar votimin e fshehtë, pra refuzim për realizimin e një të drejte, që e garanton Aktgjykimi i Gjykatës Kushtetuese.
Avni Dehari ka komentuar Aktgjykimin e Gjykatës Kushtetuese lidhur me procesin e konstituimit të Kuvendit të Kosovës, duke theksuar se as Kushtetuta dhe as Rregullorja e Kuvendit nuk e përcaktojnë nëse votimi për kryetarin e Kuvendit duhet të jetë i hapur apo i fshehtë.
Duke iu referuar pikës 178 të aktgjykimit të Gjykatës Kushtetuese, Dehari sqaroi se mocionet procedurale nuk janë të vlefshme në seancën konstituive, dhe se neni 57 i Rregullores së Kuvendit zbatohet vetëm në seanca plenare dhe jo në seancën e parë të konstituimit.
Sipas Deharit, refuzimi i deputetëve për të votuar formimin e komisionit për votim të fshehtë përbën një pengesë ndaj realizimit të një të drejte që është e garantuar nga Kushtetuta, përkatësisht nga interpretimi i Gjykatës Kushtetuese.
Ai rikujtoi se janë mbajtur gjashtë votime të hapura për zgjedhjen e kryetares së Kuvendit, të gjitha të pasuksesshme. Në këtë kontekst, Dehari, si kryesues i seancës konstituive, ka propozuar votimin e fshehtë, në përputhje me frymën e Aktgjykimit të vitit 2014 të Gjykatës Kushtetuese.
“Njëra mënyrë e votimit nuk ka më shumë peshë apo vlerë sesa tjetra,” theksoi ai, duke shtuar se mosvotimi i komisionit për votimin e fshehtë nënkupton refuzim për të zbatuar një formë të mundshme votimi që do të mundësonte konstituimin e Kuvendit.
