Kryesuesi i seancës konstituive të Kuvendit të Kosovës, Avni Dehari, ka ftuar përfaqësuesit e partive politike për konsultime, në përpjekje për të gjetur rrugëdalje nga bllokada parlamentare.
Ftesa është bërë në nisje të vazhdimit të seancës së 38-të konstituive të Kuvendit, e cila po mbahet pas vendimit të Gjykatës Kushtetuese, që urdhëron përmbylljen e konstituimit të legjislaturës brenda afatit prej 30 ditësh.
“Bazuar në vendimin e Gjykatës Kushtetuese të publikuar të enjten, kam ftuar përfaqësuesit e të gjitha partive parlamentare për konsultime,” tha Dehari.
Qëllimi i kësaj ftese, sipas tij, është gjetja e një zgjidhjeje për përfundimin e konstituimit të Kuvendit dhe shmangien e thellimit të krizës institucionale.
