Për më shumë se dy orë, pacientët në Klinikën Neurologjike dhe asaj të Kirurgjisë ishin pa rrymë.
E shkak i kësaj, ishte kjo trafo e energjisë që pësoi dëmtim afër Kirurgjisë në Qendrën Klinike Universitare të Kosovës.
Për këtë defekt, kishin ardhur edhe ekipe të KEDS-it, atyre nga Zjarrfikësit dhe zyrtarë të Policisë së Kosovës.
Por edhe pas dy orëve intervenim, klinikat ishin ende pa rrymë.
Nga Shërbimi Spitalor dhe Klinik Universitar i Kosovës kanë thënë se ekipet përgjegjëse po punojnë për të sanuar problemin.
“Pas një defekti të paraqitur në një trafo elektrike mbrapa Klinikës së Kirurgjisë, ekipet e shërbimeve teknike kanë reaguar menjëherë duke dalë në vendin e ngjarjes. Gjithashtu, në terren ka dalë edhe ekipi për mirëmbajtjen e trafove nga KEDS, të cilët janë duke punuar në sanimin e defektit. Në pikat vitale të rëndësishme të Klinikës së Kirurgjisë janë vënë në funksion gjeneratorët për të siguruar furnizim me energji elektrike”, tha zëdhënësja Mirlinda Qyqalla.
Nga KEDS-i kanë treguar se prishja ka ndodhur në përgjegjegjësinë e QKUK-së.
“Me ndihmën e ekipeve të KEDS-it, furnizimi me energji elektrike në trafostacionin ‘Kirurgjia’ është rikthyer, ndërsa aktualisht pa energji elektrike ka mbetur vetëm Ambulanta Specialistike, për të cilën ekipet e KEDS-it po punojnë intensivisht në rikthimin sa më të shpejtë të energjisë dhe normalizimin e plotë të situatës. Arsyeja e zjarrit ka qenë një prishje në kthinë mbrojtëse transformatorike në këtë trafostacion. Prishja ka ndodhur në anën e përgjegjësisë së QKUK-së, ndërsa ekipet e KEDS-it po vazhdojnë punën në terren për t’u ndihmuar atyre dhe për ta vlerësuar situatën”, deklaroi Bleona Dallaveraj nga KEDS.
Derisa ekipi i televizionit ishte duke raportuar, rryma u rikthye në Klinikën Neurologjike.
