Synim kryeqytetin e kanë të gjithë partitë politike.
Ata po bëjnë fushatë për Prishtinën me premtimet nga më të ndryshmet.
Kryetari aktual i Prishtinës që po synon edhe një mandat, Përparim Rama banorëve iu premtoi tram elektrik.
“TRAM-i i parë elektrik në Prishtinë, me kapacitet për 300 persona. Nga Fusha Kosova deri në lagjet e kryeqytetit, Linja e re që fillon nga viti 2026-të”, deklaroi Rama.
Premtim ndryshe prej Ramës bëri kandidati i Partisë Demokratike të Kosovës, Uran Ismaili.
Ai e pati një premtim për banorët e Arbërisë.
“Lidhja e shkallëve emblematike të Arbërisë deri tek parku, dhe kthimi i tyre në pikë turistik dhe integrimi i stacionit të trenit dhe vijes hekurudhore me korridore të sigurta për këmbësorët, linja të reja të trafikut urban që mbulojnë tërë lagjen”, deklaroi Ismaili.
Zgjidhje për Prishtinën patën edhe kandidatët e tjerë.
Profesori universitar Nol Dedaj thotë se fushata ka filluar me gënjeshtra të mëdha.
Sipas tij, asnjëri nga kandidatët nuk kanë program të komunikacionit dhe të transportit.
“Na e kemi Prishtinën në orë kulmore tërë ditën, ne së pari duhet të ndërtojmë infrastrukturën rrugore që brenda shiritit të qarkullimit të automjetit munden me lëvizë vetëm mjetet e transportit publik, pastaj automjetet me përparësi kalimi, nën përcjellje dhe taksi dhe shërbimet e tjera transportuese”, deklaroi Dedaj.
Dedaj thotë se disa nga premtimet e lartë përmendura janë jashtë çdo parashikimi për qytetarët.
“Fushata sa i përket transportit dhe komunikacionit ka filluar me rrena të mëdhaja. Në qoftë se na flasim për transportin publik në aspektin e zhvillimit sa i përket mjeteve transportuese me energji elektrike sikurse janë tramvajat ajo është dicka që është utopike sa i përket Kosovës, dmth as në horizont nuk shihet se leje më në realitet që mundet me ndodhë brenda 18 muajve e të tjerë”.
Deri më 12 tetor kanë mbetur edhe tetë ditë për fushatë zgjedhore në vend.
