Futbollistet e Kosovës të martën kanë mbajtur stërvitjen e parë në Kampin Nacional në Hajvali, në kuadër të grumbullimit për ndeshjet kualifikuese për Kampionatin Evropian, që do t’i luajë kundër Kroacisë.
“Dardanet” do të përballen sërish me një kundërshtar të fortë, që në ranglistë renditet shumë më lart se sa Kosova.
Përzgjedhësja Anneli Andersen edhe pse e konsideron të vështirë përballjen me Kroacinë, ka theksuar se lojtaret e saj do ta japin maksimumin për të arritur rezultat pozitiv.
“Jam shumë e lumtur të rikthehem sërish në grumbullim dhe të provojmë të mësojmë dhe të luftojmë sa më shumë. Futbolli i femrave po zhvillohet çdo ditë dhe ne gjithmonë përballemi me ekipe të forta. Ne e kemi analizuar kundërshtarin. Kroacia bën të njëjtën gjë që ne bëjmë dhe do të mundohet për të arritur fitoren. Do të jetë një ndeshje e vështirë. Ne çdo herë po punojmë që të përmirësohemi”, ka theksuar Andersen.
Ndërkohë, grupi i futbollisteve, që është një përzierje e atyre që luajnë në Evropë dhe kampionatin vendor, po i presin me padurim dy ndeshjet me kroatet.
Kosova përballjen e parë me Kroacinë e zhvillon të premten nga ora 17:00 në stadiumin “Zahir Pajaziti” në Podujevë, derisa më 2 qershor udhëton për në Kroaci për duelin kthyes.
Aktualisht, “Dardanet” kanë zhvilluar dy ndeshje në kuadër të Grupit B4 në Ligën B të kualifikimeve për Euro 2025. Në të dyja ndeshjes, Kosova ka pësuar humbje kundër Ukrainës dhe Uellsit.
