Komisioni Qendror i Zgjedhjeve ka publikuar rezultatet përfundimtare nga procesi i votimit për apo kundër largimit të kryetarëve nga funksioni në komunat Leposaviq, Zubin Potok, Zveçan dhe Mitrovicë e Veriut.
Nga KQZ thonë se në rezultatet përfundimtare mund të vërehet ndonjë ndryshim lidhur me numrin e përgjithshëm të votave nga ato që janë prezantuar në konferencën e orës 19:30, më 21 prill.
Sipas KQZ-së, kjo ndodhë për shkak se në këto rezultate përfundimtare janë përfshirë edhe votat nga Votimi me Kusht dhe votat nga Votimi i Personave me Nevoja të Veçanta.
Ndërsa në raportimet nga dita e votimit, KQZ zakonisht i referohet vetëm statistikave nga vendvotimet e rregullta, ku nuk përfshihet Votimi me Kusht dhe Votimi i Personave me Nevoja të Veçanta (VPNV).
Mbrëmë, Komisioni Qëndror i Zgjedhjeve në konferencën për medie pas mbylljes së vendvotimeve në komunat veriore të vendit, ka njoftuar se iniciativa qytetare për largimin e kryetarëve në këto komuna ka dështuar.
Kjo pasi sipas kryesuesit të KQZ-së, Kreshnik Radoniqi nuk është arritur 50 për qind plus një që është përqindje e domosdoshme.
“Duke u mbështetur në të dhënat e daljes së votuesve në këtë proces ju njoftojmë se nuk kanë votuar shumica e votuesve të regjistruar siç kërkohet me nenin 72 të Ligjit për Vetëqeversjen Lokale në Republikën e Kosovës, pra nuk është arritur 50% i domosdoshëm, andaj konstatojmë se iniciativa qytetare për largimin e kryetarëve të komunave Leposaviq, Zubin Potok, Zveçan dhe Mitrovicë e Veriut ka dështuar”, tha ai. /teve1.info/
