Qeveria e Kosovës ka konfirmuar se ka pasur një dakordim me emisarin Lajçak “për krijimin e parakushteve pёr pёrforcim tё fokusit nё zbatimin e plotё dhe tё pakusht tё Marrёveshjes Bazike tё 27 shkurtit dhe aneksit tё Ohrit tё datёs 18 mars”.
Në këtë kontekst nga Qeveria kanë thënë se është rënë dakord që të tërhiqen menjëherë 25 % e policëve që po qëndrojnë në dhe rreth objekteve komunale në pjesën veriore.
“Qeveria e Kosovёs publikisht e tregon gatishmёrinё e saj pёr tё kontribuar nё deeskalimin e situatёs dhe mosndёrmarrjen e veprimeve qё mund tё eskalojnё situatёn nё veriun e vendit. Kjo pёrfshin njё zvogёlim tё menjёhershёm nё masёn e 25% tё prezencёs policore nё dhe rreth ndёrtesave komunale”.
Zvogëlimi i prezencës policore mund të vazhdojë varësisht gjendjes së sigurisë.
“Policia e Kosovës bashkё me EULEX-in dhe KFOR-in, sipas nevojës do të vlerёsojnё gjendjen e sigurisё, nё veçanti pёr tё shikuar mundёsinё pёr zvogёlim tё mёtejmë tё prezencёs policore nё dhe rreth ndёrtesave komunale”, bëhet e ditur nga Qeveria.
Po ashtu Ekzekutivi përmes një deklarate do të mbështes mbajtjen e zgjedhjeve të parakohshme në komunat veriore të cilat do të mbahen pas verës.
“Qeveria e Kosovёs pёrmes njё deklarate publike mbёshtet mbajtjen e zgjedhjeve tё parakohshme nё 4 komunat nё veri tё vendit dhe atё pas stinёs sё verёs. Kosova shpreh pёrkushtimin pёr sigurimin e bazёs sё nevojshme ligjore pёr tё mundёsuar organizimin e kёtyre zgjedhjeve”, thuhet në njoftim.
Teksa po ashtu bëhet e ditur se është dakorduar që BE të ftojë dy kryenegociatorёt nё Bruksel me synim finalizimin e planit tё sekuencimit pёr Marrёveshjen drejt Normalizimit, pas tё cilit do tё fillojё zbatimi i tё gjitha neneve tё marrёveshjes.
Veprimet e dakorduara do tё finalizohen brenda njё periudhe dyjavore.
