Trajneri i Ballkanit, Ilir Daja, ka folur në konferencë për media në prag të ndeshjes me Viktoria Plzenin në Ligën e Konferencës së Evropës.
“E njohim skuadren me të cilën do përballemi, dhe jemi të vetëdijshëm që janë favorit, për faktin se kanë ngritur nivelin shumë viteve të fundit dhe kanë shfaqur ndeshje të mëdha në kompeticionet evropiane”, ka thënë Daja në konferencë për media.
“Ne e respektojmë, por kjo s’do të thotë që ne hyjmë të dorëzuar, pasi do të bëjmë përpjekjet tona maksimale, për t’i shfaqur më të mirat tona”.
Sipas Dajës, Ballkani është në pozitë të vështirë për shkak të lojtarëve premtues që po largohen drejt ligave më të forta, mirëpo sërish u shpreh optimist.
“Ndonëse jemi pak të penalizuar për shkak të lojtarëve që jemi detyruar t’i lëshojmë në kampionate më të mëdha, nesër ne do të dalim në fushë që ta zhvillojmë lojën tonë dhe të synojmë të bëjmë mirē”.
Në konferencë ishte edhe sulmuesi Albin Berisha i cili e ka potencuar faktin se Plzen është favorit.
Sulmuesi tha se pavarësisht që e respektojnë maksimalisht kundërshtarin, “më shumë Ballkani e respekton veten, prandaj duke u fokusuar në pikat e forta tona të forta, do të tentojmë të shfaqim më të mirën tonë”.
