Presidenti i Këshillit Evropian, António Costa, ka qëndruar sot për vizitë në Kosovë, ku ka zhvilluar takime me ushtruesen e detyrës së presidentes, Albulena Haxhiu, kryeministrin në detyrë, Albin Kurti, si dhe me përfaqësues të partive opozitare.
Në konferencën për media pas takimeve, Costa theksoi se Bashkimi Evropian mbetet partneri më i madh dhe më i besueshëm i Kosovës, duke kujtuar se BE-ja ka investuar rreth 3.7 miliardë euro në sektorë të ndryshëm, përfshirë arsimin, infrastrukturën, energjinë, mjedisin dhe zhvillimin e bizneseve.
Ai vlerësoi gjithashtu përkushtimin e Kosovës në harmonizimin e politikës së saj të jashtme dhe të sigurisë me atë të Bashkimit Evropian, duke e cilësuar këtë si një dëshmi të qartë të orientimit strategjik evropian të vendit.
Duke folur për zgjedhjet e 7 qershorit, Costa u bëri thirrje të gjitha forcave politike që të tregojnë përgjegjësi dhe të kontribuojnë në forcimin e institucioneve demokratike.
Costa bëri të ditur se gjatë takimeve të zhvilluara në Prishtinë ka inkurajuar spektrin politik që procesi i integrimit evropian të trajtohet si një objektiv i përbashkët kombëtar, përtej dallimeve partiake dhe përplasjeve politike.
“Bashkimi Evropian ka qenë partneri më i madh dhe më i besueshëm i Kosovës si dhe ofruesi më i madh i asistencës…Sot kemi investuar 3.7 miliardë euro në arsim, infrastrukturë, energji, mjedis biznese, ne jemi të gatshëm të bëjmë edhe më shumë sepse ne besojmë që e ardhmja e Kosovës është në BE. E lavdëroj Kosovën për përafrimin e tij të plotë dhe vullnetar në politikën e përbashkët të jashtme dhe të sigurisë të BE-së që është sinjal i qartë i orientimit strategjik të Kosovës. Për sa kohë që Kosova po shkon në zgjedhje në këtë fundjavë mesazhi im për të gjitha partitë politike është se partneriteti vijë me përgjegjësi. BE do ta mbështet Kosovën të cilat duhet t’i kryejë detyrat e saj. Kosova ka nevojë për institucione të forta, të qëndrueshme dhe funksionale. Në takimin e sotëm kam inkurajuar të gjithë akterët politikë që ta bëjnë integrimin evropian përtej ndarjeve dhe përçarjeve politike”, ka deklaruar Costa./teve1.info/
