Vlora Çitaku nga Partia Demokratike e Kosovës ka thënë se dy raportet e rëndësishme ndërkombëtare për Kosovën, ai i Departamentit Amerikan të Shtetit, dhe i organizatës amerikane “Freedom House, godasin korrupsionin serioz qeveritar në Kosovë.
Madje Çitaku tha se publikimi i këtyre dy raporteve duhet të shërbejë si alarm zgjimi për Qeverinë, duke theksuar se nuk duhet të mbyllim sytë para tyre.
“Raporti i fundit i Departamentit Amerikan të Shtetit i publikuar dje, dhe ai i FreedomHouse i publikuar sot – janë tejet shqetësues dhe duhet të shërbejnë si alarm zgjimi për Qeverinë. Mos të harrojmë – kemi hyrë në vitin e katërt të qeverisjes Kurti. Dhe, përmes vlerëismit ndërkombëtar, jo atij të brendshëm opozitar, rezultati është korrupsioni, ndërhyrja në drejtësi dhe shkeljet e të drejtave të njeriut. Kaq për shpresën e premtuar! Këto raporte, para të cilave nuk guxojmë të mbyllim sytë, kërkojnë veprime të menjëhershme dhe jo fjalë e justifikime – pasi ato godasin vetë thelbin e vlerave dhe parimeve tona demokratike. Gjetjet e këtyre dy raporteve paraqesin një pamje të zymtë të shtetit tonë – që relfketon keq dhe dëmton imazhin e Kosovës në botë. Një gjyqësor që i mungon pavarësia, kufizime të rënda në lirinë e shprehjes dhe lirinë e medias, korrupsionin e shfrenuar qeveritar, dhuna e përhapur me bazë gjinore – nuk janë pamja ideale e një shteti që synon integrimin euro-atlantik dhe anëtarësimin në organizata ndërkombëtare”, tha ajo.
Më tej, Çitaku tha se Qeveria duhet të kuptojë se këto nuk janë thjesht statistika por sipas saj, janë padrejtësi të jetës reale me të cilat përballen çdo ditë qytetarët.
Derisa theksoi se duke dënuar këto padrejtësi, PDK kërkon nga Qeveria adresimin e menjëhershëm të këtyre problemeve.
“Qeveria duhet të kuptojë se këto nuk janë thjesht statistika apo probleme abstrakte; janë padrejtësi të jetës reale me të cilat përballen çdo ditë qytetarët tanë dhe bota po i sheh ato. Duke dënuar fuqishëm këto padrejtësi, PDK kërkon nga Qeveria adresimin e mënjehërshëm të këtyre probleme. Krahas Qeverisë, ftojmë edhe organet e drejtësisë që të kryejnë me përgjegjësi dhe seriozitetin më të lartë detyrat e tyre – duke mos lënë ardhmërinë e shtetit tonë peng të një paaftësie të thellë politike. Kjo është një betejë që duhet luftuar çdo ditë, nga të gjithë akterët që kanë pushtet ekzekutiv në vend. PDK, përmes të gjitha mekanizmave të saj, do të angazhohet që të shtyjë përpara reformat e nevojshme në ndërtimin e një Kosove ku çdo individ trajtohet me dinjitet dhe respekt”, shtoi tutje Çitaku.
Ndryshe, edhe Lidhja Demokratike e Kosovës në reagimin e saj ka thënë se Raporti i Departamentit Amerikan të Shtetit, edhe Organizata Amerikane “Freedom House” në raportin e vitit 2024 kanë përmend korrupsionin qeveritar, që sipas tyre “Vazhdon të jetë shqetësim SERIOZ në Kosovë”.
Sipas tyre, nga gjithsej 7 pikë në luftën kundër korrupsionit, Kosova është vlerësuar me vetëm 2.25. Kjo thuhet se dëshmon edhe njëherë se korrupsioni gjatë kësaj qeverie nuk është luftuar../teve1.info./