Vlora Çitaku nga Partia Demokratike e Kosovës (PDK) ka reaguar ndaj deklaratës së ministrit në detyrë të Punëve të Jashtme dhe Diasporës, Glauk Konjufca, i cili përdori termin “frizerkë” në adresim të ish-presidentes, Vjosa Osmani, duke e cilësuar gjuhën e përdorur si përçmuese dhe të papranueshme.
Në një postim në Facebook, Çitaku ka thënë se çdo profesion i ndershëm meriton respekt dhe vlerësim, duke shtuar se njeh shumë frizerë dhe frizere që punësojnë dhjetëra qytetarë, mbajnë familje dhe kontribuojnë përmes taksave në shtet.
Ajo ka theksuar se problemi nuk qëndron te profesioni në fjalë, por te mënyra se si ai përdoret për të nënçmuar një grua në diskursin politik.
“Çdo punë e bërë me nder duhet trajtuar me respekt. Secili prej nesh ka një rol dhe një funksion në shoqëri. Secili njeri që punon ndershëm e me përkushtim meriton vlerësim. Unë njoh frizerë e frizere që punësojnë dhjetëra gra e burra, që mbajnë familje, që paguajnë taksa, përmes të cilave paguhemi edhe ne si zyrtarë publikë. Prandaj, nuk do të shqetësohesha fare për këtë krahasim, sikur të mos ishte ngarkesa pezhorative që po i mvishet këtij profesioni të ndershëm. E kur përdoret nga një politikan si mjet për ta sulmuar e nënçmuar një grua tjetër, atëherë bëhet edhe më e turpshme”, ka shkruar Çitaku.
Në fund të reagimit të saj, ajo ka shtuar se nuk ka punë të turpshme, ndërsa arroganca dhe përçmimi ndaj njerëzve që punojnë ndershëm janë të papranueshme.
Ndryshe, ministri i Jashtëm në detyrë, Glauk Konjufca, gjatë një takimi me qytetarë, ka ironizuar me Vjosa Osmanin.
“Qyre, kur jena te frizerkat”, dëgjohet të thotë Konjufca, para se të shpërthente në të qeshura, të cilave iu bashkuan edhe disa nga të pranishmit.
Termi “frizerkë” është përdorur edhe më herët në grupe, faqe dhe profile të ndryshme në rrjetet sociale që mbështesin Lëvizja Vetëvendosje, me qëllim ironizimin dhe ofendimin e Osmanit./teve1.info/
