Agron Gashi i plagosi mbrëmjen e së mërkurës Jeton Berishën bashkë me dy djemtë e tij, Jetnis dhe Jetart Berisha.
E për veprën penale në të cilën ai ngarkohet “Vrasje e rëndë në tentativë”, Gashi mund të dënohet maksimumi 10 vjet.
Mirëpo, avokati Anton Nrecaj thotë se në shumicën e rasteve dënimi jepet më pak se ky numër.
“Në praktikë, në situata të tilla rastet janë shumë të rralla kur është shqiptuar dënimi maksimal. Mos shqiptimi i dënimeve maksimale e ka atë efektin domino ku po iu jep kurajo atyre të cilët veç se kanë pasur dosje penale mbi bazën e të cilës ata e marrin jo serioze edhe aspektin e zbatimit të drejtësisë”, tha Nrecaj.
Sipas tij, ky dënim ndryshon nëse njëri nga të plagosurit ndërron jetë.
“Vrasja në këtë situatë mesatarja të them ashtu varësisht prej mënyrës se si e kualifikojnë veprën penale organi ndjekës, këto vepra janë të dënueshme deri në 15 vjet burgim dhe një proces gjyqësor në të cilën po supozoj që do të zgjasë me vite sepse natyrisht sistemi jonë i drejtësisë i jep të drejtë të barabartë të gjitha palëve”, tha ai.
Nga ana tjetër, sociologu Genc Xërxa thotë se institucionet përkatëse kanë dështuar për të kryer punën e tyre.
Xërxa thotë faji është zinxhiror.
“Kemi institucionin familje e cila i nevojitet një edukim i mirëfilltë dhe si duket këtu kemi ngecje në disa raste, pastaj institucionet edukativo-arsimore, pastaj një gamë e përcjellës së këtyre recidivistëve nga aspekti i shëndetit mendor, psikologët që duhet të i qasën, mirëqenies sociale dhe me një fjalë të përgatisim për një ri-integrim në shoqëri”, tha Xërxa.
Fillimisht Agron Gashi ka ikur nga vendi i ngjarjes dhe është shpallur në kërkim nga Policia e Kosovës.
Ai u arrestua pasditen e së enjtes në fshatin Ozdrimë të kësaj komune.
