Sulmuesi Sokol Cikalleshi ka njoftuar për tërheqje nga Kombëtarja e Shqipërisë, një ditë pasi u konfirmua se nuk është pjesë e listës për “Euro 2024”.
Trajneri i Shqipërisë, Sylvinho të hënën publikoi listën prej 27 lojtarëve, në të cilën nuk ishte emri i Cikalleshit. Sulmuesi 33-vjeçar në një letër publike ka thënë se është i lumtur për kontributin e tij te Shqipëria.
“Ashtu siç, çdo fillim e ka një fund, edhe rrugëtimit tim me ekipin kombëtar të futbollit i erdhi fundi!”, ka shkruar ndër të tjera Cikalleshi në letrën e tij.
Po ashtu, Cikalleshi ka uruar që kombëtarja të ketë sukses në Evropian dhe të bëjë paraqitje dinjitoze. Ai ka qenë për një kohë të gjatë njëri ndër lojtarët kryesor të Shqipërisë, ndërsa në 58 paraqitje ka shënuar 13 gola.
