Pensionistët në Kosovë e kanë mirëpritur vendimin e qeverisë për t’i ndarë nga 100 euro për fundvit. Sipas tyre këto mjete sadopak do t’ua lehtësojnë problemet, megjithëse shpresojnë që në të ardhmen pensionet do të rriten.
Ruzhdi Cernavorni, pjesën më të madhe të kohës e kalon në klubin e pensionistëve duke luajtur shah me shokët e tij.
Në fundvit, ai së bashku me pensionistët e tjerë do të përfitojnë nga 100 euro shtesë pas vendimit të qeverisë për t’i ndarë këto mjete për ta dhe për fëmijët deri në moshën 16 vjeçare.
Cernavorni e ka mirëpritur këtë vendim të qeverisë, mirëpo ai shprehet më i lumtur për fëmijët.
“Mirë shumë kanë bërë me këtë veprim sepse fëmijët gëzohen. Na pleqtë do të shkojmë nga kjo botë dhe nuk varemi nga 100 euro, sepse neve vetëm na barna na shkojnë këto para. Respekt për këtë vendim sepse është i mirë”, thotë ai.
E lumtur me këto shtesa po shprehet edhe Fetije Huruglica, ndonëse shpreson që në të ardhmen do të rriten pensionet për të gjithë.
“Na ka ardhur mirë sepse ky nuk është viti i parë që e kemi këtë rritje nga kjo qeveri aktuale. Si për mua si për shokun është e vlefshme. Përveç tjerash edhe nipi im i është gëzuar shumë këtij lajmi”, shprehet ajo
Kurse, Hasan Blaku thotë se shtesa prej 1.000 eurove do të ishte edhe më e mirë.
“Çdo ndihmë për pensionistin është e mirëseardhur. Nëse do të ishin 1.000 euro do të ishim më të lumtur por nuk janë këto mundësi. Respekt për të dytë që dolën në televizor edhe na e dhanë këtë lajm. Disa po flasin se kinse e kanë bërë për vota por me tregoni ju mua si mund të blihet vota për 100 euro”, thotë ai
Ka edhe prej tyre që besojnë se me këto mjete do të zbutet sadopak varfëria.
“Është një vendim i duhur që sadopak e zbutë varfërinë sepse nuk ka vepër më të mirë se sa si t’i gëzosh fëmijët në prag të festave. Me këtë vendim deri diku barazohen fëmijët e të varfërve me ata të pasurve. Edhe pensionistët të cilët janë në gjendje më të rëndë sadopak ua zbutë vështirësitë”, shprehet pensionisti Bajram Maloku
Në anën tjetër partitë opozitare kanë kritikuar qeverinë për shtesat duke thënë se ky veprim është bërë për qëllime elektorale në prag të zgjedhjeve nacionale.
