Gjatë muajit maj , kanë dalë haptas me deklarata publike për mospajtime presidentja e shtetit, Vjosa Osmani me ekzekutivin. Siç duket, Osmani i ka prishur raportet me partnerët e saj të koalicionit qeverisës. Njohësit e politikës thonë se e para e shtetit ka prishje të raporteve edhe me njerëzit e partisë së saj, Listës Guxo.
Përmes deklarimeve të fundit të saj publike, Vjosa Osmani vulosi mospajtimet me ekzekutivin.
E para e shtetit për dy javë pati deklarata të kundërta me qëndrimin e kryeministrit të Kosovës, Albin Kurti dhe krye-parlamentarin Glauk Konjufca.
Andaj, njohësit e politikës në bazë të këtyre sjelljeve, konsiderojnë se ajo ka prishje të raporteve me qeverinë.
Për diplomatin Blerim Canaj kanë qenë të pritshme këto ftohje tash e gjashtë muaj.
“Tanimë po e shohim që në qoftë se e mendojmë si listë Vjosa Osmanin dhe Donika Gërvallën ajo listë është gati inekzistente, do të thotë që nuk ka kurrfarë faktori. Kam përshtypjen që do të ketë shkrirje të disa deputetëve të Listës Guxo në Vetëvendosje dhe përpjekjet që disa të tjerë të shkojnë në LDK në qoftë se kanë lënë vend. Ata pastaj mund ta paraqesin edhe si koalicion por pastaj shtrohet pyetja se cili është interesi i Lëvizjes Vetëvendosje që t’i ofrojë këta njerëz për shkak që nuk e besoj që kanë peshë në votë”, vlerëson Canaj.
Nga ana tjetër, analisti politik Visar Xani thotë se koalicioni në mes presidentes dhe kryeministrit ka përfunduar që prej zgjedhjes së Vjosës presidente të shtetit.
“Konsideroj se koalicioni në mes Kurtit dhe Osmanit ka përfunduar qysh në zgjedhjen për presidente të zonjës Osmani por që mbetet me u pa raportet në mes partisë Guxo dhe kryeministrit Kurti, unë nuk besoj që ka ndonjë telash kryeministri Kurti me këtë parti sepse deputetët e saj nuk kanë ndonjë reagim përkundrazi janë shumë të zëshëm pro qeverisë dhe mbase janë duke punuar për një koalicion të ardhshëm, por po të ishte zonja Osmani kryetare e partisë Guxo nuk besoj se do të kishte një koalicion madje do i duhej lobimi edhe vet brenda partisë Guxo për ti fituar votat po të ishte në proces zgjedhor”, ka thënë Xani.
Ekipi i Tëvë1 tentoi të marrë të enjten edhe një qëndrim nga shefi i qeverisë në lidhje me këtë çështje por Kurti nuk u deklarua.
Më 16 maj, ministrja e Punëve të Jashtme dhe Diasporës që është nga Lista Guxo, Donika Gërvalla ka dërguar një letër në Asamblenë Parlamentare të Këshillit të Evropës, Osmani tha që ky veprim u bë pa dakordim me të.
