Janë bërë pothuajse dy muaj që kur në vend ndodhi një rast makabër.
Vrasja e Gjylejta Ukellës, në shtëpinë e saj nga bashkëshorti, ku prezentë ishin edhe fëmijët e tyre, kishte tronditur opinionin.
Për këtë rast, ende nuk ka një aktakuzë, derisa i dyshuari vazhdon të jetë nën masën e paraburgimit.
Megjithatë, nga Prokuroria Themelore në Pejë, thonë se është çështje kohe kur kjo do të adresohet, meqë janë duke punuar intensivisht me rastin.
“Lidhur me këtë çështje penale, prokurorja e çështjes ka ndërmarrë veprime intensive në koordinim të plotë me Policiën e Kosovës. Njëkohësisht, janë dërguar ftesa tek të gjitha palët për intervistim tek prokurorja e çështjes dhe janë dërguar dhjetëra autorizime të tjera të cilat do të shërbejnë në procedura penale për fajësinë e personit të dyshuar. Dhe besoj se brenda një afati optimal, Prokuroria do të dalë me një qëndrim në lidhje me këtë çështje penale”, ka thënë zëdhënësi i prokurorisë, Shkodran Nikçi.
Nikçi potencoi se provat që është duke i mbledhur Prokuroria, do të jenë të mjaftueshme që trupi gjykues ta dënoj të pandehurin me dënimin meritor.
“Hetimet janë duke u bërë në drejtim të veprës penale vrasje e rëndë. Dhe siç e dini, kjo vrasje është kryer në rrethana mjaftë të rënda. Duhet të jemi të rezervuar në dhënien e informatave, por ajo çfarë mund të themi është se kjo çështje është duke shkuar në drejtimin e duhur, dhe se kjo çështje penale do të kompletohet me provat e nevojshme për të dëshmuar fajësinë e personit të pandehur. Dhe njëkohësisht, këto prova do të prezantohen para trupit gjykues që i pandehuri ta marrë dënimin meritor”, ka thënë ai.
Drejtësi për këtë rast, ishte kërkuar edhe përmes protestave të organizuara në Pejë e Prishtinë.
