Këngëtarja e famshme kanadeze Céline Dion ka shpallur rikthimin e saj në skenë, katër vite pasi u diagnostikua me një sëmundje të rrallë neurologjike që ndikoi në zërin dhe lëvizshmërinë e saj.
Dion do të mbajë një 10 netë koncertes në Paris La Défense Arena (me kapacitet 40 mijë vende) gjatë muajve shtator dhe tetor.
Njoftimi u bë në ditën e 58-vjetorit të saj përmes një postimi në Instagram, ku artistja e quajti rikthimin “dhuratën më të madhe të jetës”.
“Jam gati për këtë, ndihem e fortë, e emocionuar dhe sigurisht pak nervoze,” tha ajo në një mesazh për fansat.
Dion, e njohur për hite si “My Heart Will Go On” dhe “Because You Loved Me”, nuk ka performuar live që nga marsi 2020. Turneu i saj Courage u ndërpre nga pandemia e Covid-19, ndërsa më pas u detyrua të anulonte të gjitha shfaqjet për shkak të diagnozës me Stiff Person Syndrome (SPS).
Duke folur për gjendjen e saj shëndetësore, Dion tha: “Jam shumë mirë, po menaxhoj shëndetin tim, po ndihem mirë. Po këndoj sërish, madje po bëj edhe pak vallëzim.Por duhet t’ju them diçka shumë të rëndësishme: gjatë këtyre viteve, çdo ditë kam ndjerë lutjet dhe mbështetjen tuaj, mirësinë dhe dashurinë tuaj. Jam mirënjohëse për të gjithë ju. Mezi pres orën të takohemi sërish.”
Për rikthimin e saj, koncertet janë planifikuar me intervale të rregullta për të shmangur lodhjen fizike. Biletat do të dalin në shitje më 7 prill, ndërsa kërkesa pritet të jetë shumë e lartë.
Pas lajmit për rikthimin e artistes, të hënën mbrëma Kulla Eiffel u ndriçua me mesazhin “Paris, je suis prête” (Paris, jam gati), ndërsa u transmetuan këngët më të njohura të saj.
