Një çantë e dyshimtë u gjet paraditen e sotme, në afërsi të Gjykatës Themelore në Ferizaj. Gjatë kryerjes së hetimeve nga ana e njësitit për deminim të Policisë, në këtë institucion u lajmërua gruaja që e kishte harruar çantën në mes të rrugës.
Kjo është gjithë çfarë ka mbetur, në vendin që dyshohej për skenë krimi.
Në këtë pjesë të rrugës “Sali Çeku”, në Ferizaj, e cila ndodhet përballë Gjykatës Themelore, u gjet një çantë e dyshimtë.
Për këtë u vu menjëherë në lëvizje Policia e Kosovës.
Për më shumë se tre orë, ky vend ishte i rrethuar me shirita policorë, ku u aktivizuan edhe njësite të deminimit, në kuadër të Policisë së Kosovës.
Deri në kryerjen e hetimeve, rruga ishte pothuajse tërësisht e bllokuar, duke shkaktuar edhe ngarkesa në komunikacion.
Por, çanta doli të jetë e një gruaje që e kishte harruar në rrugë.
“Është lajmëruar një qytetare që e ka harruar aty pa dashje. Njëkohësisht është kontrolluar valixhja dhe nuk ka pasur asgjë të dyshuar. Të gjitha njësitet janë larguar nga vendi i ngjarjes dhe është liruar rruga. Ndërsa qytetarja është ftuar për intervistë në stacionin e policisë në Ferizaj. Për të gjitha veprimet policore është njoftuar prokurori i shtetit”, ka deklaruar Policia e Kosovës.
Raste të tilla për gjësende të dyshimta, gjatë vitit kishte edhe në Aeroportin e Prishtinës.
