Më 15 prill të zgjedhurit e popullit pritet që të betohen si deputetët të Kuvendit të Kosovës.
Kjo pas ftesës së presidentes , Vjosa Osmani, e cila thirri mbledhjen e parë të Legjislaturës së nëntë të Kuvendit të Kosovës.
Por ani pse është caktuar data e seancës konstituive, ende nuk dihet se kush do ta formojë Qeverinë e Kosovës.
E gjithë kjo po ndodhë pasi asnjëra nga partitë nuk ka arritur votat e mjaftueshme për të bërë vetë qeverinë.
Por nga Lëvizja Vetëvendosje janë shprehur të bindur që një gjë të tillë mund ta bëjnë me 15 prill, ani pse nuk kanë treguar se në cilat vota po llogarisin.
“Sa i përket zgjedhjeve krejt çka presim është të themelohet shumë shpejtë Qeveria e Kosovës në parlament. Fillimisht parlamenti duhet të konstituohet. Besoj që i kemi numrat”, tha nënkryetari i LVV-së, Glauk Konjufca.
Madje edhe anëtari i kësaj partie, Agim Bahtiri është shprehur 100% i sigurt që kanë votat.
“Qeveria do të themelohet pa asnjë problem. 100% i kemi votat për të formuar qeverinë”, është shprehur ai.
Bahtiri kishte deklaruar në media që ka njohuri se tre deputetë të Nismës Socialdemokrate do e mbështesin qeverinë Kurti 3.
Televizioni ka kontaktuar me dy deputetet e zgjedhura të Nismës, Xhevahire Izmakun dhe Arbëresha Krasniqit, por të njëjtat nuk kanë pranuar të flasin rreth kësaj teme.
Ndërsa partneri i NISMËS, Aleanca për Ardhmërinë e Kosovës është skeptike se Vetëvendosje do i bëjë 61 vota.
Kryeministri Kurti të dielën është shprehur i bindur që do ta formojë qeverinë gjatë seancës konstituive.
