Eugen Cakolli nga Instituti Demokratik i Kosovës ka paralajmëruar se çdo vonesë në shpalljen e datës së zgjedhjeve të jashtëzakonshme parlamentare rrit rrezikun për funksionimin normal të institucioneve vitin e ardhshëm.
Në një postim në Facebook, Cakolli ka shpjeguar se sipas afateve aktuale ligjore, edhe pse Kushtetuta dhe Ligji për Zgjedhjet nuk janë plotësisht të harmonizuara, datat reale për mbajtjen e zgjedhjeve mbeten 21 dhe 28 dhjetori.
Ai po ashtu ka paralajmëruar se nëse konsultimet dhe vendimmarrja e Presidentes shtyhen pas 22 nëntorit, 21 dhjetori nuk do të jetë më i mundur, duke shtyrë zgjedhjet potencialisht në janar.
“Sa më shumë që Presidentja e vonon shpalljen e datës së zgjedhjeve, aq më shumë rritet rreziku për funksionimin normal të institucioneve vitin e ardhshëm. Çdo ditë e humbur sot i ngushton opsionet ligjore, i shtyn afatet dhe e afron vendin me skenarë të pasigurt kushtetues, politik dhe fiskal. Sipas afateve aktuale – edhe pse Kushtetuta dhe Ligji për Zgjedhjet nuk janë plotësisht konsistentë në mënyrën se si përcaktojnë dhe përllogarisin afatet – datat reale për mbajtjen e zgjedhjeve të parakohshme mbeten 21 dhe 28 dhjetori. Por nëse konsultimet dhe vendimmarrja përkatëse e Presidentes shtyhen pas 22 nëntorit, edhe 21 dhjetori bie si opsion, duke i shtyrë zgjedhjet potencialisht drejt janarit. E zgjedhjet në janar përbëjnë rrezik shumëfish më të madh, sepse nëse ato nuk mbahen brenda këtij viti, zgjatja automatike e ndarjeve buxhetore vlen vetëm për muajin janar, por jo edhe për shkurt”, ka shkruar Cakolli.
Ai tutje ka nënvizuar se mbajtja e zgjedhjeve në dhjetor, sa më herët të jetë e mundur, është mënyra e vetme për të shmangur kriza të reja dhe për të ulur presionin kohor për formimin e institucioneve, të cilat duhet të përmbyllen në ditët e para të marsit.
Sipas tij, çdo vonesë në shpalljen e datës afron vendin “me skajet e afateve kushtetuese”, duke rritur rreziqet për stabilitetin politik, fiskal dhe kushtetues.
“Prandaj, mbajtja e zgjedhjeve në dhjetor, madje sa më herët që të jetë e mundur, është mënyra e vetme për të shmangur kriza të reja dhe për të zvogëluar presionin kohor për formimin e institucioneve, të cilat duhet të përmbyllen patjetër në ditët e para të marsit. Sa më shumë të vonohet shpallja e datës, aq më afër skajit të afateve kushtetuese shtyhet vendi, me të gjitha rreziqet që i sjell një skenar i tillë”, ka përfunduar Cakolli.
Ndryshe, sot (19 nëntor) mandatari i dytë i LVV-së, Glauk Konjufca ka dështuar që ta formojë Qeverinë e re të Kosovës, pasi ekzekutivi i prezantuar nga ai mori vetëm 56 vota për, 53 votuan kundër dhe katër abstenuan.
Me dështimin e dytë për formimin e ekzekutivit, hapet rruga për zgjedhje të reja.
