Eugen Cakolli nga Instituti Demokratik i Kosovës (KDI) ka reaguar pas deklaratës së kryesuesit të seancës konstituive të Kuvendit, Avni Dehari, i cili një ditë më parë kishte ritheksuar se votimi i fshehtë është rruga për të dalë nga bllokada institucionale.
Në një postim në Facebook, Cakolli ka vënë në dyshim legjitimitetin dhe efektivitetin e kësaj qasjeje, duke theksuar se votimi i fshehtë ka dështuar 34 herë deri më tani, gjashtë herë më shumë se ai i hapur, dhe si i tillë nuk mund të cilësohet si zgjidhje.
“Si mund të quhet ‘zgjidhje’ një procedurë që ka dështuar 34 herë radhazi, gjashtëfish më shumë sesa ajo e hapur?”, ka shkruar ai.
Cakolli shtoi se insistimi i vazhdueshëm për votim të fshehtë, madje edhe nga vetë Kryesuesi i seancës, është bërë absurd dhe pa përputhje me Kushtetutën. Ai theksoi se çdo përpjekje për ndryshim të mënyrës së votimit gjatë seancës është e paligjshme, pasi kjo mund të vendoset vetëm gjatë takimit përgatitor mes grupeve parlamentare dhe ish-Kryetarit të Kuvendit – takim i mbajtur më 8 prill.
“Kryesuesi nuk ka kurrfarë diskrecioni e autoriteti për të ndryshuar mënyrën e votimit gjatë seancës,” u shpreh Cakolli, duke e cilësuar një vendim të tillë si “të njëanshëm dhe arbitrar”.
Ai i bëri thirrje Kryesuesit Avni Dehari dhe Lëvizjes Vetëvendosje që të ndalin manipulimet procedurale dhe të kthehen te dialogu dhe kompromisi politik, siç kërkohet edhe në aktgjykimin e fundit të Gjykatës Kushtetuese – dokument i cili, sipas Cakollit, po injorohet me vetëdije nga ana e tyre.
