Eugen Cakolli nga KDI ka vlerësuar se vendimi I fundit I Gjykatës Kushtetuese nuk përfaqëson ndonjë ndryshim apo privilegj të ri për komunitetet joshumicë, përfshirë atë serb.
Sipas Cakollit, Gjykata thjesht ka rikonfirmuar një standard të njohur kushtetues që Kuvendi i Kosovës konsiderohet i konstituuar vetëm pasi të zgjidhen kryetari dhe të gjithë nënkryetarët e tij, përfshirë ata nga radhët e komuniteteve.
“Por kjo nuk nënkupton të drejtë të ndokujt për bllokadë. Përkundrazi, në të njëjtin vendim, Gjykata ua rikujtoi përgjegjësinë të gjitha palëve, përfshirë deputetët nga komuniteti serb, që të veprojnë në interes të Republikës. Pra, e drejta për të propozuar nuk mund të jetë mjet bllokimi apo shantazhi”, ka shkruar Cakolli në llogarinë e tij në Facebook.
Ai ka shtuar se i njëjti standard do të zbatohej edhe nëse ndonjë kandidat shqiptar për nënkryetar nuk do të merrte votat e nevojshme ‘Kuvendi do të mbetej i pakonstituuar’.
“Në të njëjtën logjikë, edhe nëse nuk do të votohej si nënkryetar ndonjë prej kandidatëve nga partitë shqiptare, Kuvendi do të konsiderohej sërish i pakonstituuar. Prandaj, nuk kemi të bëjmë me “privilegje të serbëve”, por me një standard që vlen për të gjithë – dhe që ka funksionuar pa probleme që nga pavarësia e këndej”, ka theksuar ai.
Cakolli e ka cilësuar situatën aktuale si “sajesë të qartë politike” për të zvarritur formimin e institucioneve të reja.
“Ajo çfarë po ndodh tani është sajesë e qartë për të zvarritur formimin e institucioneve. Ironia është se e gjithë kjo situatë, bashkë me diskursin e pritshëm kundër Gjykatës Kushtetuese, po vjen nga të njëjtët që ia mundësuan Listës Serbe rastin dhe “fitoren” në Gjykatë – me kalkulimet dhe arrogancën e tyre politike”, ka përfunduar Cakolli.
