Analisti politik Viktor Buzhala ka vlerësuar se opozita në Kosovë po “gabon” në kalkulimet e saj politike lidhur me zgjedhjet e fundit dhe mundësinë e shkuarjes në zgjedhje të reja.
Sipas tij, partitë opozitare kishin pritur rritje elektorale edhe në zgjedhjet e kaluara, por kjo nuk është realizuar, ndërsa një skenar i ri zgjedhor, siç tha ai, mund të sjellë rezultate edhe më të dobëta për to.
Buzhala theksoi se vendimi i qytetarëve në zgjedhje është ai që përcakton rezultatin politik, duke shtuar se subjektet që përballen me votën nuk dalin në pozita më të favorshme pas saj.
Ai shtoi se vazhdimi i “kryeneçësisë politike” dhe mungesës së përgjegjësisë institucionale pa ofruar zgjidhje konkrete, nuk i sjell përfitim asnjë partie politike.
“Opozita ka menduar që do të rriten edhe në zgjedhjet e kaluara, edhe nuk u rriten. Edhe nëse tash e çojnë vendin në zgjedhje e që janë duke e çuar realisht atëherë padiskutim që do të dalin edhe më keq. Nëse vazhdohet me këtë kryeneçësi dhe këtë papërgjegjësi institucionale pa ofruar asgjë dhe me çua vendin në zgjedhje veç pse po mendon që rritesh padiskutim që në fund populli vendos edhe kur po vendos populli nuk po i kanë mirë punët ata që po janë ballafaquar me atë send”, ka thënë ai në emisionin “Këndi i Debatit” në Tëvë1.
