Amerikani i Sigal Prishtinës, Damiree Burns është shpallur lojtari më i mirë për xhiron e pestë të Superligës së Kosovës në basketboll.
Federata e Basketbollit të Kosovës (FBK), të hënën ka njoftuar se Burns e ka fituar çmimin “MVP i Javës” pas paraqitjes fantastike që e pati ndaj Pejës.
Prishtina në kuadër të xhiros së pestë triumfoi ndaj Pejës, ndërsa Burns kontribuoi me “duble-double” prej 23 pikëve e 22 kërcimeve, duke e pasur indeksin 24, më të lartin për xhiron e pestë.
Po ashtu, Burns ka zënë vend edhe në pesëshen e javës, pjesë e së cilës janë edhe Desmond Cambridge e Malik Johnson të Trepçës, Alex Lomax i Borës dhe , Mack Smith i Bashkimit.
Kur jemi te Bashkimi, klubi nga Prizreni mbetet i vetmi që ende nuk di për humbje në elitën e basketbollit kosovar.
Bashkimi në xhiron e fundit mposhti Golden Eagle Yllin me shifrat 77:66. Prishtina triumfoi 78:67 ndaj Pejës, ndërsa fitore shënuan edhe Bora e Trepça.
Bora mposhti Vëllaznimin 86:61, ndërsa Trepça triumfoi ndaj Proton Cable Prizrenit me rezultatin 89:68.
Në xhiron e gjashtë që zhvillohet në vikend, do të përballen këto skuadra: Trepça – Peja, Bashkimi – Sigal Prishtina, Vëllaznimi – Ylli dhe Prizreni – Bora.
