Monumenti “NEWBORN”, simboli i 17 shkurtit dhe i lindjes së shtetit të Kosovës, është “burgosur” simbolikisht nga aktivistët e platformës “Liria ka emër”, duke vendosur rrethoja hekuri dhe tabela me mbishkrimin “Kosova e burgosur”, për të protestuar ndaj proceseve gjyqësore në Dhomat e Specializuara të Kosovës në Hagë.
Eliza Hoxha nga organizata “Liria ka emër” ka thënë se ky reagim qytetar është kundër asaj që e konsiderojnë një padrejtësi historike, që prek themelet e shtetit.
“NEWBORN-i, simboli i 17 shkurtit dhe i lindjes së Republikës sonë, po burgoset simbolikisht për të pasqyruar ndjenjën e padrejtësisë që qytetarët dhe Kosova po e përjetojnë përballë proceseve gjyqësore që po zhvillohen në Dhomat e Specializuara të Kosovës në Hagë”, ka deklaruar Hoxha.
Ajo ka theksuar se proceset në Hagë nuk gjykojnë vetëm individë, por edhe historinë, luftën për liri dhe procesin e shtetformimit të Kosovës.
“Si të paraburgosur në Hagë, që pesë vjet po mbahet Hashim Thaçi, ish-presidenti dhe kryeministri që lexoi Deklaratën e Pavarësisë së Kosovës dhe udhëhoqi procesin e shtetndërtimit, po mbahen ish-kryeparlamentarët Jakup Krasniqi dhe Kadri Veseli, si dhe ish-deputeti Rexhep Selimi, figurat kyçe të rezistencës, lirisë dhe pavarësisë së shtetit të Kosovës”, theksohet në njoftim./teve1.info/
