Deputetja e Lidhjes Demokratike të Kosovës, Valentina Bunjaku-Rexhepi, thotë se brenda Autoritetit të Konkurrencës është duke ndodhur skandal me punëtorët të cilët po abuzohen nga kryetarja e Bordit dhe kryetari.
Bunjaku thotë se nuk është spekulim, derisa ka dhënë edhe detaje se çfarë po ndodh brenda Bordit.
“Prej mediave jam e informuar që në Autoritetin e Konkurrencës, Bordin të cilin këta e kanë vendos Kuvendi i Republikës i ka votuar këta njerëz e kur kanë ardhë në fillim në pushtet gjithmonë kanë pasur kritika ndaj Bordit. Bile ka pas rast, kur një kolege e imja në komision i ka thënë një anëtari të Bordit ‘ti shumë i vjetër çka ke lypë me qenë anëtar’. Kjo ka qenë skandal për mendimin tim. Pra, vetëm për shkak të moshës e të tjerët nuk i kanë lënë që të flasin në fillim të mandatit. Ju media hulumtoni se kush ka qenë ai. Nuk është spekulim mbaj përgjegjësi për krejt këtë çka e flas”, tha ajo në emisionin “Info Nata” në Tëvë1.
Deputetja opozitare thotë se anëtarët e Bordit janë zgjedhur nga partia në pushtet – LVV.
“E kanë zgjedh vetë bordin, të gjithë janë njerëzit e vetë që i ka vendos VV-ja. Atë Bord e ka vendosur në Parlament, sepse arroganca dhe numrat po i kanë. E tashmë, në autoritetin e Konkurrencës është një autoritet që duhet me bë një punë jashtëzakonisht të madhe duke pasur parasysh inflacionin në vend. E tani aty rrihen zyrtarë me grushte me anëtarë të bordit dhe me drejtorin”, tha ajo.
Bunjaku thotë se nën udhëheqjen e kryetares dhe drejtorit, bordi mblidhet për të bërë marrëveshje për korrupsion.
“Neimja – kryetarja e Bordit dhe drejtori Selajdin, këta dy bashkëpunojnë bashkë dhe i abuzojnë punëtorët i terrorizojnë stafin aty inspektorët e të gjithë ata. Tan kohën thirrin oligarkë, i marrin në pyetje, fillojnë hetime ndaj oligarkëve, mandej po të njëjtit që i kanë thirr dhe që i kanë nisur hetimet ndaj tyre u pa në takim kryetarja e Bordit me ata që i kanë hetu. Janë takuar për marrëveshje direkte, për marrëveshje për korrupsion”, deklaroi deputetja.
Ndërkohë, ajo fton Prokurorinë që ta hetojë “keqpërdorimin që po ndodh në Autoritetin e Konkurrencës”.
“Ftoj Prokurorinë me zbarku te Autoriteti i Konkurrencës dhe thjesht me hetu të gjithë ata që po keqpërdorin, ka abuzim me stafin, ka keqpërdorim financiar”, deklaroi ajo./teve1.info/
