Bulliqi thotë se ky projekt, ka rezultuar totalisht i papërgatitur nga ana e Ministrisë së Infrastrukturës i cili sipas tij në atë kohë ishte ishte nisur për fushatë elektorale.
Ai bëri të ditur se tashmë kanë hartuar elaboratin e shpronësimit të pronave.
“Vetë fillimi i kësaj rruge është bërë me një pompozitet politik për nevojat e asaj periudhe kohore, do të thotë për zgjedhje. Por, fatkeqësisht doli që fillimi i këtij projekti ka qenë totalisht i papërgatitur nga ana e Ministrisë së Infrastrukturës. Ky projekt në vete ka shumë mangësi, në radhë të parë, nuk është realizuar fare elaborati i shpronësimit të pronave se nga do të kalojë rruga. Ne nuk po punojmë se si kanë punuar të tjerët, ne kemi filluar me radhë. Në radhë të parë është hartuar elaborati i shpronësimit të pronave, që tashmë është në Ministrinë e Infrastrukturës. Në atë rrugë nuk është planifikuar as ndalje e stacionit të autobusëve, as rrugët lidhëse, dalëse e as hyrëse dhe tërë këto e bëjnë këtë rrugë të rrezikshme dhe të paqëndrueshme”, tha Bulliqi në emisionin “Infonata”.
Zvarritja e punimeve në zgjerimin e rrugës Prishtinë – Podujevë, u ka shkaktuar probleme të shumta tash e disa vite, jo vetëm pjesëmarrësve në komunikacion, por edhe banorëve të fshatrave përreth këtij aksi rrugor.