Kandidati i Partisë Demokratike të Kosovës për kryetar të Lipjanit, Shukri Buja, ka premtuar se në mandatin e tij do të filloj rregullimin e shtratit të lumit Sitnica.
Nëpërmjet një postimi në Facebook, Buja ka theksuar se ky projekt nuk është vetëm rregullim i një shtrati lumi, por është investim në cilësinë e jetës, në mirëqenie dhe në kohën e lirë.
“Lumi si Sitnica nuk duhet të jetë simbol i neglizhencës, por i jetës, i gjelbërimit dhe i bukurisë urbane. Në mandatin tonë, do të fillojmë rregullimin e shtratit të lumit Sitnica në pjesën që shtrihet në anën e majtë të rrugës “Hajredin Bajrami”. Aty ku sot kemi një hapësirë të degraduar, nesër do të ndërtojmë një zonë funksionale dhe atraktive për qytetarët tanë. Ky projekt nuk është vetëm rregullim i një shtrati lumi është investim në cilësinë e jetës, në mirëqenie, në kohën e lirë, në qytetin që duam t’ua lëmë brezave të ardhshëm”, ka shkruar Buja.
Ai po ashtu ka premtuar se do të ndërtojnë shtigje për ecje dhe çiklizëm, do të krijojnë kënde lojërash për fëmijë, hapësira për relaks dhe gjelbërim ‘një zonë urbane e re që do t’i japë frymëmarrje qytetit dhe do të afrojë njerëzit me natyrën’
“Ky është vizioni ynë: një Lipjan i pastër, i gjelbër, me hapësira për familje, për fëmijë, për të rinj e për të moshuar”, ka theksuar ai.
