Britania e Madhe u ka bërë thirrje shteteve anëtare të Kombeve të Bashkuara që ende nuk e kanë njohur pavarësinë e Kosovës që ta bëjnë këtë, duke e cilësuar njohjen si “thelbësore për stabilitetin afatgjatë në rajon dhe për zhbllokimin e potencialit të plotë të vendit”.
Deklaratat u bënë gjatë seancës së Këshillit të Sigurimit të OKB-së, ku u diskutua raporti i fundit i Sekretarit të Përgjithshëm të Kombeve të Bashkuara, Antonio Guterres, për situatën në Kosovë.
“Britania mbetet përkrahëse e palëkundur e zhvillimit demokratik të Kosovës dhe shtegut të saj euroatlantik. Si ndër vendet e para që e kanë njohur pavarësinë e Kosovës, u bëjmë thirrje shteteve anëtare që ende nuk e kanë bërë këtë, t’i bashkohen shumicës,” deklaroi përfaqësuesja britanike.
“Njohja është esenciale për stabilitet afatgjatë dhe për zhbllokimin e potencialit të plotë të Kosovës,” shtoi ajo.
Përfaqësuesja britanike shprehu shqetësim lidhur me disa deklarata të fundit që, sipas saj, “rrezikojnë të rrënojnë institucionet shtetërore, përfshirë Gjykatën Kushtetuese”. Ajo vlerësoi procesin zgjedhor lokal në Kosovë, duke e cilësuar atë si “të qetë dhe demokratik”, dhe inkurajoi formimin e shpejtë të qeverisë së re.
“Institucionet e forta dhe gjithëpërfshirëse janë jetike për të avancuar integrimin ndërkombëtar të Kosovës dhe për të ofruar progres për qytetarët e saj,” theksoi ajo.
Britania e mirëpriti kthimin e kryetarëve serbë në komunat me shumicë serbe, duke e quajtur këtë “një hap pozitiv drejt një pushteti lokal përfaqësues”.
“Tranzicioni institucional duhet të zhvillohet me respektim të plotë të sundimit të ligjit dhe me mundësi reale për riintegrimin e komunitetit serb,” theksoi ajo.
Thirrje Serbisë për dorëzimin e Radoiçiqit dhe zbatim të marrëveshjeve
Në lidhje me sulmin e armatosur në Banjskë, që ndodhi dy vjet më parë, Britania ritheksoi nevojën për llogaridhënie dhe kërkoi nga Serbia bashkëpunim të plotë për të ulur tensionet.
“Llogaridhënia për sulmin në Banjskë dhe për sulmet ndaj KFOR-it është pritur shumë gjatë. Serbia duhet të sigurojë përgjegjësinë penale të autorëve të sulmit, përfshirë dorëzimin e Milan Radoiçiqit,” u tha në deklaratë.
Përfaqësuesja britanike theksoi rëndësinë e zbatimit të marrëveshjeve ekzistuese, përfshirë formimin e Asociacionit të Komunave me Shumicë Serbe, që e quajti “element thelbësor për ndërtimin e besimit dhe sigurimin e stabilitetit afatgjatë”.
Në fund të deklaratës, Britania kërkoi një rishikim strategjik të rolit të UNMIK-ut dhe efikasitet më të madh në përdorimin e resurseve të Kombeve të Bashkuara.
“Me presionin e shtuar mbi buxhetin e Kombeve të Bashkuara, resurset duhet të rialokohen aty ku kanë më shumë efekt, e jo të mbahen në misione të trashëguara pa mandat të qartë,” u tha në deklaratë.
“Ne mbështesim një qasje më efikase të stafit civil dhe rishikim të rolit të UNMIK-ut në përputhje me nevojat aktuale në terren.”
