Shefi i politikës së jashtme të BE-së, Josep Borrell ka thënë se Srebrenica mbetet një plagë e thellë në historinë e Evropës.
Derisa, ai ka thënë se Asambleja e Përgjithshme e Kombeve të Bashkuara e ka ngritur rëndësinë e kësaj tragjedie përtej Evropës.
“Srebrenica mbetet një plagë e thellë në historinë e Evropës. Dështimi për të parandaluar këtë gjenocid është një barrë që ne vazhdojmë ta mbajmë. Të dyjat, Gjykata Penale Ndërkombëtare për ish-Jugosllavinë dhe Gjykata Ndërkombëtare e Drejtësisë i kanë përcaktuar pa mëdyshje këto mizori si gjenocid. Duke caktuar 11 korrikun si “Ditën Ndërkombëtare të Reflektimit dhe Përkujtimit të Gjenocidit të 1995 në Srebrenicë”, Asambleja e Përgjithshme e Kombeve të Bashkuara, e ka ngritur rëndësinë e kësaj tragjedie përtej Evropës”, ka thënë ai.
Më tej, ai ka nënvizuar angazhimin e BE-së për të mbështetur Bosnjën dhe Hercegovinën në krijimin e shtetit dhe shoqërisë demokratike.
“Në mars, krerët e vendeve anëtare të BE-së vendosën të hapin negociatat e anëtarësimit të BE-së me Bosnje dhe Hercegovinën. Fillimi i këtij udhëtimi drejt anëtarësimit në BE sjell shpresë të re për stabilitet politik, zhvillim ekonomik dhe një të ardhme më të mirë për qytetarët e BeH. Kjo nënvizon angazhimin e BE-së për të mbështetur Bosnjën dhe Hercegovinën në krijimin e një shteti dhe një shoqërie demokratike funksionale ku mbizotërojnë pluralizmi, drejtësia dhe dinjiteti njerëzor”, shtoi ai./teve1.info/