Kolona të shumta u panë gjatë ditës në Fushë-Kosovë, për shkak të reshjeve të mëdha të borës.
Aty u pa që shumica e veturave kishin probleme në qarkullim për shkak edhe të rrugëve të cilat nuk ishin të pastruara.
E kryetari i Komunës së Prishtinës, përmes një postimi në Facebook bëri të ditur gjatë ditës se po punojnë që rrugët të jenë të kalueshme, andaj kërkoi kujdes gjatë ngasjes së veturave.
“Bora e parë ka mbuluar Prishtinën tonë me një veshje të bardhë magjike! E ne po kujdesemi që rrugët tona të jenë të pastra e lehtë të qarkullueshme për të gjithë. Të dashur qytetarë, keni kujdes gjatë ngasjes së veturave. Le ta përcjellim borën e parë me dashuri dhe kënaqësi!”, ka thënë kryetari i Prishtinës, Përparim Rama.
E për shkak të këtyre reshjeve, të shtunën kanë mbetur pa rrymë disa banorë në katër komuna të Kosovës.
Përmes njoftimit, Kompania për Distribuimin e Energjisë njoftoi se ekipet janë në terren që po punojnë vazhdimisht ta kthejnë në normalitet gjendjen e furnizimit me energji.
“Për shkak të borës që filloi të bie sot herët në mëngjes, e shoqëruar me erëra, janë shkaktuar disa dëme në asetet tona, kryesisht në shtylla dhe në përçues elektrikë. Distriktet më të prekura janë Ferizaj, Prishtina, Mitrovica dhe Prizreni. Ekipet e KEDS-it gjenden në terren dhe po punojnë pandërprerë në mënyrë që ta kthejnë në normalitet gjendjen me furnizim me energji elektrike”, ka njoftuar KEDS-i.
E me rënien e borës së parë në Kosovë, qytetarët ia kanë mësyrë për ndërrimin e gomave të verës me ato të dimrit.
Disa nga shoferët u ankuan për çmimet e larta, e disa të tjerë thanë se çmimet janë të arsyeshme, por se kanë mbetur vonë dhe se janë duke pritur në radhë deri në pesë orë për ndërrimin e gomave.
