Kryeministri i Kosovës, Albin Kurti ka thënë se nuk ka informacion se sot përgjatë takimeve në Bruksel do të diskutohet edhe çështja e bllokimit të qytetarëve kosovarë, e zyrtarëve policorë nga shteti serb, në pikat kufitare Kroaci – Serbi, shkruan teve1.info.
Madje ai deklaroi se kjo nuk është çështje që do të duhej të diskutohej në dialog, pasi që sipas tij, kjo është shkelje e të drejtave të njeriut.
“Nuk është problem ecja e dialogut sa shkelja e marrëveshjes. Dhe nuk kam informacion deri më tani se cilat tema do të diskutohen në Bruksel, por kjo do të thotë që nuk kam informacion që do të ketë tema të reja. Nuk më duket që kjo është çështje e dialogut, përshtypja ime është që bëhet fjalë për shkelje të drejtave të njeriut, për shkelje të drejtave të qytetarëve tanë, për shkelje të lirisë së qarkullimit dhe marrëveshjeve që janë bë në Bruksel”, tha Kurti.
Ndryshe, Kurti ka konfirmuar nga mbledhja e Qeverisë se janë liruar katër nga pesë zyrtarët policorë që po mbaheshin në Rashkë të Serbisë.
Sipas Kurtit, katër zyrtarët tashmë janë liruar dhe se i ndaluar vazhdon të mbetet vetëm zëvendësdrejtori i Policisë së Kosovës, Dejan Jankoviq.
Derisa, sot në Bruksel kryenegociatori i Kosovës, Besnik Bislimi dhe ai i Serbisë, Petar Petkoviq, po diskutojnë rreth Rregullores së BQK-së, ku palët pritet t’i diskutojnë propozimet e e tyre./teve1.info.