Leon Avdullahu ka zgjedhur Kombëtaren e Kosovës dhe jo atë të Zvicrës. Ky vendim i talentit të madh shihet si një shuplakë e rëndë për Federatën Zvicerane të Futbollit.
Mesfushori 21-vjeçar, i rritur në Solothurn, ka kaluar nëpër të gjitha grupmoshat e kombëtares zvicerane që nga viti 2019. Së fundmi u transferua nga Baseli te Hoffenheimi për 8 milionë franga dhe tashmë ka bërë debutimin në Bundesliga. Por, përfaqësuesja që ai ka zgjedhur është Kosova.
Ky vendim ka shkaktuar shumë debat. Në Zvicër shihet si një dështim i madh për menaxhimin e talenteve, pasi një lojtar i formuar në çdo nivel nga federata zgjedh një komb më të dobët sportivisht, megjithëse Zvicra e dëshironte me çdo kusht.
Drejtori i sportit në gazetën Blick, Emanuel Gisi, e krahason këtë rast me largimet e dhimbshme të Ivan Rakitic dhe Mladen Petriç, ndërsa e vendos pranë rastit të Zdravko Kuzmanovic.
A do të bëhet Avdullahu një rast si Rakitic, që shkëlqeu me Kroacinë, apo si Kuzmanovic që nuk e justifikoi zgjedhjen? Sipas Gisi, koha do ta tregojë.
Federata zvicerane, nën drejtimin e Pierluigi Tamit, po kritikohet rëndë për mënyrën si i trajton talentet.
Sipas shkrimit të Blick, mungon qasja individuale, komunikimi i hershëm dhe perspektiva e qartë për lojtarët e rinj. Në futbollin modern, kjo shihet si mungesë respekti.
Presidenti i ri i federatës, Peter Knäbel, kishte bërë përpjekje për ta bindur lojtarin, madje ishte parë në tribuna pranë babait të Avdullahut gjatë debutimit të tij në Bundesliga. Por, përpjekja mbeti e pasuksesshme.
Situata rëndohet edhe më shumë pasi Zvicra ka humbur edhe një tjetër talent, Eman Kospa (18), që pritet të zgjedhë Bosnjën. Dy largime në një javë kanë hapur debat të madh për të ardhmen e menaxhimit të talenteve në vend.
