Zëvendëskryeministri i Kosovës, Besnik Bislimi është mirëpritur nga Drejtorja për Çështjet e Evropës Qendrore dhe Jugore në Departamentin Amerikan të Shtetit, Colleen Hyland.
Sipas komunikatës së Zyrës së Kryeministrit, përgjatë takimit ata kanë biseduar rreth zhvillimit dhe rritjes ekonomike të Kosovës si dhe sigurinë energjetike dhe investimet në këtë fushë.
Temë e trajtuar ishte edhe sulmi kinetik i javës së kaluar në kanalin e Ibër-Lepencit, si vazhdimësi e përpjekjeve, planifikimeve dhe organizimeve me synim destabilizimin e Kosovës.
Tutje, Bislimi i ka falënderuar Shtetet e Bashkuara të Amerikës për dënimin e sulmit dhe mbështetjen ndaj Kosovës në zbardhjen e plotë të tij.
“Më tej, ai ka diskutuar edhe rreth iniciativave e politikave të ndërmarra nga qeveria për të mbështetur komunitetin serb në Kosovë dhe lehtësimin e integrimit të tyre. Në takim u diskutua dhe rreth zhvillimeve në lidhje me procesin e dialogut”, thuhet në komunikatë./teve1.info/
