Zëvendëskryeministri Bislimi u prit nga Ministri për Çështje të Bashkimit Evropian të Hungarisë, Janos Boka, raporton teve1.info
Sipas komunikatës për medie të Qeverisë, zëvendëskryeministri Bislimi pati mundësinë të njihej së afërmi përmes këtij takimi me prioritetet e Presidencës së ardhshme të Hungarisë në Këshillin e Bashkimit Evropian, e cila starton nga data 1 korrik.
Ndër prioritetet kryesore është dhe zgjerimi i BE-së me fokus në rajonin e Ballkanit Perëndimor, të cilën zëvendëskryeministri e përshëndeti dhe vlerësoi lartësisht, thuhet në komunikatë.
“Në dritën e integrimit të rajonit në BE, ai foli për situatën aktuale të Kosovës në këtë rrugëtim, ku shprehu mbështetjen e lartë qytetare në vend për aderim në unionin evropian, nënvizoi aplikimin tonë për anëtarësim në dhjetorin e vitit 2022 dhe nevojën për trajtimin e këtij aplikimi me qëllim arritjen e hapava konkret tutje përmes marrjes së pyetësorit e më pas statusit të vendit kandidat, por edhe theksoi përkushtimin në zbatimin e agjendës së reformave evropiane dhe punën e cila po zhvillohet aktualisht në kuadër të Planit të Rritjes”, thuhet në komunikatën e lëshuar nga Qeveria.
I pranishëm në këtë takim ishte dhe zëvendësministri i Punëve të Brendshme, Bardhyl Dobra, i cili trajtoi reformën në administratën publike si pjesë e proceseve me vëmendje të veçantë në arritjen e standardeve dhe zbatimit të praktikave efektive evropiane.
