Zëvendëskryeministri i parë për Integrim Evropian, Zhvillim dhe Dialog i Republikës së Kosovës, Besnik Bislimi, priti në takim lamtumirës ambasadorin e Austrisë në Kosovë, Christoph Weidinger, raporton teve1.info
“E kam shijuar kohën e kaluar në Kosovë. Kosova do të ruajë gjithmonë një vend të veçantë në zemrën time për shkak të ngrohtësisë dhe mikpritjes së njerëzve”, u shpreh ambasadori Weidinger në hyrje të takimit, thuhet në komunikatën për medie të lëshuar nga Qeveria.
Sipas komunikatës së Qeverisë, përgjatë viteve të fundit, marrëdhëniet bilaterale mes Kosovës dhe Austrisë janë intensifikuar.
“Si definicion, rinia është e ardhmja e të gjitha shteteve. Me një rini kaq aktive dhe të arsimuar, unë nuk kam asnjë dyshim që Kosova do të zhvillohet në mënyrë dinamike”, tha ambasadori Weidinger.
Kurse Bislimi potencoi mesazhin e ambasadorit duke shtuar se “Rinia në Kosovë është e ardhmja dhe e tashmja e vendit”.
“Vendi ynë po e forcon demokracinë dhe politikat e saj anti-korrupsion, duke u fokusuar në sundimin e ligjit dhe mirëqeverisjen. Benefitet e rritjes dhe zhvillimit të vendit duhet të ndahen proporcionalisht tek qytetarët tanë dhe të ulim pabarazitë”, tha zëvendëskryeministri Bislimi, duke përmendur nga mbështetjen për lehonat dhe skemat për shtesat për fëmijë e deri tek Ligji i aprovuar dje në Kuvend për skemat pensionale të financuara nga shteti, që i jep fund një padrejtësie që ka ekzistuar deri më tani.
Në përfundim, ai e vlerësoi dhe rolin e Austrisë, si një urë lidhëse mes Kosovës dhe BE-së, në rrugëtimin evropian të Kosovës.
