Zëvendëskryeministri në detyrë i Kosovës, Besnik Bislimi, ka njoftuar sot Përfaqësuesin e Posaçëm të Bashkimit Evropian për Dialogun Kosovë–Serbi, Peter Sørensen, lidhur me një çështje serioze që po pengon mbështetjen institucionale për shqiptarët në Preshevë, Bujanoc dhe Medvegjë.
Sipas Bislimit, 3,650 nxënës shqiptarë në Luginë po përdorin 35,448 tekste shkollore të financuara nga Qeveria e Kosovës, pas kërkesës zyrtare të Këshillit Kombëtar Shqiptar.
Ai theksoi se qeveria ka përmbushur plotësisht të gjitha obligimet ligjore dhe institucionale për këtë proces.
Megjithatë, ai ka thënë se pagesa përkatëse prej 304,511.16 euro, e destinuar për furnizimin me tekste, përkrahjen e aktiviteteve ndërkombëtare të avokimit dhe funksionimin e KKSH-së, është bllokuar tre herë radhazi nga banka pranuese në Serbi, pa dhënë ndonjë arsye ligjore apo teknike.
“Ky nuk është një gabim teknik, por një model i qëllimshëm administrativ që synon të pengojë mbështetjen e ligjshme për komunitetin shqiptar në Luginë,” ka deklaruar Bislimi, duke shtuar se praktika të ngjashme janë vërejtur edhe në anulimin e vendimeve të KKSH-së për subvencionet bujqësore për fermerët shqiptarë.
Sipas tij, këto nuk janë raste të izoluara, por tregues të një qasjeje të strukturuar të pengesave administrative ndaj shqiptarëve në jug të Serbisë.
Bislimi theksoi se institucionet e Kosovës i kanë vënë në dispozicion Bashkimit Evropian të gjitha provat dokumentare – përfshirë komunikimet SWIFT, kthimet bankare dhe vendimet zyrtare qeveritare.
“Kosova mbetet e përkushtuar ndaj dialogut, por nuk mund të qëndrojë indiferente kur mekanizmat administrativë përdoren për të cenuar të drejtat e shqiptarëve në Preshevë, Bujanoc dhe Medvegjë,” ka shkruar Bislimi./teve1.info/
