Bislimi në këtë takim ka folur për anëtarësimin e Kosoës në BE, shkruan Teve1.info.
“Përsa i përket aplikimit për anëtarësim në BE, Rezoluta e Parlamentit Evropian që i bën thirrje institucioneve të BE-së për t’i dhënë Ukrainës statusin e vendit kandidat në BE është shumë inkurajuese edhe për ne. Në këtë drejtim, ritheksova progresin e Kosovës në kuadër të agjendës evropiane ERA II si dhe progresin e shfaqur në fusha si sundimi i ligjit, lufta kundër krimit të organizuar dhe korrupsionit dhe zhvillimit ekonomik si dhe nevojën e përshpejtimit të procedurave për anëtarësimin në BE. Kjo, edhe për shkak të situatës gjeopolitike në Evropë dhe parandalimin e influencës ruse në Ballkan. Faktor shqetësues është fakti se Serbia ka dështuar të harmonizojë politikat e saj të jashtme me BE-në për vendosjen e sanksioneve ndaj Rusisë”, ka thënë Bislimi.
Ai ka bërë thirrje për liberalizimin e vizave për qytetarët e Kosovës.
“Gjithashtu bëra thirrje për liberalizimin e vizave për Kosovën ku Parlamenti ka votuar dy herë pro procesit të liberalizimit të vizave në Kosovë, por qytetarët e vendit mbeten akoma të izoluar,ndaj është e nevojshme përmbyllja e këtij procesi. Në mbyllje potencova objektivin kryesor gjeopolitik dhe strategjik të Kosovës i cili është anëtarësimi i ardhshëm në BE, dhe dy synime të tjera që përfshijnë heqjen e vizave dhe anëtarësimin në Këshillin e Evropës”, ka përfunduar Bislimi. /teve1.info/
