Zëvendëskryeministri i parë për Integrim Evropian, Zhvillim dhe Dialog, Besnik Bislimi tha se ish-kryeshefit të Korporatës Energjetike të Kosovës, Nagip Krasniqi është arrestuar sepse i solli kësaj kompanie 107 milionë euro profit.
Bislimi gjatë raportimit në Komisionin për Integrim Evropian theksoi se sipas tyre, ka shumë korrupsion në KEK dhe se rastet tani i kanë deponuar në Prokurori, shkruan teve1.info
“Por ja që s’ka interes politik të një institucioni që unë do të thoja është politik, siç është Prokuroria që të merret me këto raste. Por, ka interes të merret vetëm me rastin e menaxherit i cili nga një kompani që ka punuar me humbje, e ka sjellë kompaninë me 107 milionë euro profit. Ky ka qenë mëkati i Nagip Krasniqit për të cilin është dashur të arrestohet”, tha Bislimi.
“Si ka mundësi që një kompani publike të gjenerojë 107 milionë euro dhe asnjë nga këta të mos përfundojë në xhepat e politikanëve. Ky është problem i madh, andaj duhet të arrestohet që të vijë dikush tjetër pas tij i cili e ndryshon mënyrën e menaxhimit”, shtoi zëvendëskryeministri.
Ish-drejtori i KEK-ut, Nagip Krasniqi është arrestuar më 19 prill pas një bastisje që është kryer në zyret e KEK-ut nga Policia e Kosovës me urdhër të Prokurorisë.
Ai dyshohet për keqpërdorim të detyrës zyrtare.
“Me urdhër të Prokurorisë Speciale të Republikës së Kosovës (PSRK), Policia e Kosovës, ka arrestuar një person me inicialet N.K. për shkak të dyshimit të bazuar se i njëjti ka kryer veprat penale ‘’Keqpërdorimi i pozitës apo autoritetit zyrtar’’ nga neni 414 paragrafi 2 lidhur me paragrafin 1 të KPRK, ‘’Ushtrimi i ndikimit’’ nga neni 424 paragrafi 1 të KPRK-së, dhe veprën penale ‘’Konflikti i interesit’’ nga neni 417 paragrafi 2 lidhur me paragrafin 1 të KPRK-së”, thuhet në komunikatë.
Prokuroria ka bërë të ditur se bastisje përveç në zyrën e Krasniqit janë kryere dhe në banesën e tij, ku edhe janë konfiskuar disa gjëra si prova materiale./teve1.info