Zëvendëskryeministri i Republikës së Kosovës, Besnik Bislimi, ka deklaruar se Qeveria e Kosovës i mbështet kërkesat e shqiptarëve të Luginës së Preshevës.
Bislimi, ka premtuar që do të vazhdojnë të kërkojnë përkrahje nga nivelet më të larta ndërkombëtare për këto çështje.
“Qeveria e Republikës së Kosovës mbështet bashkëkombasit tanë në Preshevë, Bujanoc dhe Medvegjë si dhe mbetet e angazhuar për të ngritur këto çështje në nivelet më të larta ndërkombëtare dhe të kërkojë përkrahje për t’i dhënë fund diskriminimit të padrejtë”, ka shkruar Bislimi në Facebook.
Sipas tij, shqiptarët e Luginës vazhdojnë të përballen me diskriminim sistematik, andaj kërkesat e tyre për respektim të të drejtave janë plotesisht legjitime.
“Shqiptarët e Luginës së Preshevës vijojnë të përballen me një situatë të papranueshme diskriminimi sistematik, që cënon të drejtat e tyre themelore.Kërkesat e tyre për “respektimin e marrëveshjeve politike, ndalimin e pasivizimit të adresave, njohjen e diplomave të Kosovës dhe përfshirjen e drejtë në institucionet shtetërore” janë plotësisht legjitime dhe të drejta”, ka shtuar tutje.
Po ashtu, ai është shprehur se zgjidhja e këtyre çështjeve është dëshmi për përkushtim ndaj të drejtave të njeriut , çka sipas Bislimit, i mungon fqinjit verior.
“Zgjidhja e këtyre është dëshmi edhe për përkushtimin ndaj demokracisë dhe të drejtat e njeriut, e cila mungon nga fqinji ynë verior, që në vazhdimësi shkel të drejtat e komunitetit shqiptar”, ka thënë Bislimi./teve1.info/
