Kreu i Partisë Demokratike të Kosovës, Bedri Hamza, ka njoftuar se ish-kryetari i Komitetit Olimpik të Kosovës, Besim Hasani, do të garojë në listën e PDK-së për deputetë në zgjedhjet e 28 dhjetorit.
Hamza, në një postim në Facebook ka thënë se Kosova ka nevojë për profesionistë që sjellin përvojë, qetësi dhe rezultate.
“Kosova sot ka nevojë për profesionistë që sjellin përvojë, qetësi dhe rezultate. Prandaj, me respekt e mirëprita Besim Hasanin në listën tonë për deputetë në zgjedhjet e 28 dhjetorit”, ka shkruar Hamza.
Ai ka vlerësuar kontributin e Hasanit në anëtarësimin e Kosovës në familjen olimpike botërore dhe sukseset sportive që kanë pasuar.
“Besimi bëri punë të jashtëzakonshme për anëtarësimin e Kosovës në familjen olimpike botërore, duke hapur një epokë të re për sportin tonë dhe për medaljet që erdhën më pas. Kontributi i tij është një shembull i vizionit dhe përkushtimit. Me njerëz të tillë, Kosova ecën përpara. Bashkë, me energji të re dhe besim të plotë, do ta ndërtojmë një të ardhme më të mirë për vendin tonë”, ka përfunduar ai./teve1.info/
