Hisen Berisha nga Partia Demokratike e Kosovës ka vlerësuar si një improvizim politik dhe përpjekje të Lëvizjes Vetëvendosje për të mbajtur peng shtetin propozimin e Glauk Konjufcës për mandatar për kryeministër të Kosovës.
Berisha, në emisionin “Mesditë” në Tëvë1, shtoi se kjo është gjithashtu vetëm një mekanizëm përfitimi i LVV-së, pasi sipas tij ata nuk kanë pjekurinë e duhur politike për të menduar për të ardhmen e shtetit.
“Tashmë realiteti politik është i qartë: askush nuk ka shumicën e pretenduar për të formuar qeverinë brenda kësaj legjislature, dhe çdo skemë tjetër për të improvizuar vetëm sa e thellon krizën dhe dëmton stabilitetin e vendit. Këto improvizime politike që po provohen janë përpjekje për ta mbajtur peng shtetin dhe asgjë më shumë. Ato janë lojë për të përfituar interesa të ngushta partiake. Këta e kanë dëshmuar se nuk kanë arritur pjekurinë politike për të kaluar nga niveli i të menduarit për zgjedhjet e ardhshme në nivelin e një burrshtetasi që mendon për të ardhmen e shtetit. Për ta, pushteti është vetëm mekanizëm përfitimi”, tha ai.
Kur u pyet nëse Konjufca është më i pranueshëm si mandatar për kryeministër për PDK-në, Berisha theksoi se shumica parlamentare shqiptare në Kuvend kanë deklaruar hapur se nuk e mbështesin asnjë mandatar nga Lëvizja Vetëvendosje.
“Nuk është çështje tek individi edhe pse individi përcakton dhe determinon politikbërjen e qeverisë, por me një qëndrim të prerë që nuk e mbështet asnjë mandatar nga LVV-ja. Çdo tentativë për t’i dhënë sërish mandat kësaj partie, edhe me kandidat tjetër, është vetëm humbje kohe dhe zvarritje e panevojshme, dhe do të thellojë më tej mungesën e besimit të qytetarëve në institucione. Siç ka dështuar Kurti për të siguruar shumicën e nevojshme, do të dështojë edhe kushdo tjetër nga LVV-ja. Këto janë vetëm tendenca artificiale për të marrë pushtetin,” deklaroi Berisha./teve1.info/
