Pas takimit me presidenten e Kosovës, Vjosa Osmani, homologu i saj nga Shqipëria, Bajram Begaj tha se marrëdhëniet ndërmjet të dyja vendeve janë shumë të mira.
Presidenti shqiptar bëri të ditur se temë diskutimi gjatë takimit ishte edhe situata në veri të Kosovës, me ç’rast, siç tha ai, duhet një koordinim i ngushtë me Shtetet e Bashkuara të Amerikës dhe Bashkimin Evropian, përcjell teve1.info
Sipas tij, askush nuk mund ta vërë në pikëpyetje sovranitetin e Kosovës dhe as të mërzitet pse Shqipëria e mbështet Kosovën, pasi ky është “detyrim kombëtar”.
“Vlerësova se pavarësisht provokimeve për të tensionuar situatën në komunat me shumicë serbe në veriun e Kosovës, si dhe ndërhyrjeve hibride nga aktorë të tretë dashakeqës, duhet një koordinim më i ngushtë dhe më i mirë me partnerët tanë kryesorë, SHBA dhe BE, për të gjitha veprimet e ndërmarra. Askush nuk mund të vërë në pikëpyetje sovranitetin dhe integritetin terriorital të Kosovës, si dhe të drejtën e saj për të zbatuar ligjet dhe Kushtetutën e vendit, por koordinimi me partnerët, është i domosdoshëm”, tha ai në një konferencë të përbashkët me Osmanin.
Begaj potencoi se dialogu i ndërmjetësuar nga BE-ja është rruga drejt anëtarësimit të Kosovës në organizata ndërkombëtare, përfshirë OKB-në.
“Gjithashtu nënvizova se dialogu i ndërmjetësuar nga BE dhe i mbështetur fuqimisht nga SHBA, është rruga e vetme drejt paqes, normalizimit të marrëdhënieve, si dhe anëtarësimit të Kosovës në organizata rajonale dhe ndërkombëtare, përfshirë dhe atë të OKB-së. E sigurova presidenten Osmani për mbështetjen e plotë dhe angazhimin e Shqipërisë për të kontribuar me çdo mjet dhe me të gjitha mundësitë e saj në mënyrë konstruktive në funksion të këtij dialogu”, shtoi ai.
Presidentja Osmani është duke qëndruar në një vizitë dyditore në Shqipëri, teksa pritet të ketë edhe takime të tjera të nivelit të lartë. /Teve1.info/
